«Հարցումները վերաբերվել են կամ Ինֆորմացիայի ազատության կենտրոնին, կամ քաղաքացիներին, լրագրողներին հետաքրքրող տեղեկություններին: «Սեւ ցուցակում» ընդգրկված անձինք անպատասխան են թողել ոչ միայն առաջին տեղեկատվություն ստանալու հարցումը, այլեւ դրանից հետո ուղարկված կրկնակի հարցումը»,-այսօր լրագրողների հետ հանդիպման ժամանակ Ինֆորմացիայի ազատության կենտրոնի նախագահ Շուշան Դոյդոյանը հրապարակեց 2012թ. ընթացքում մարդկանց տեղեկատվություն ստանալու իրավունքը խախտած պաշտոնյաների սեւ եւ տեղեկատվության ոլորտում իրենց աշխատանքը վերանայած պաշտոնյաների սպիտակ ցուցակները:
«Սեւ ցուցակում» ընդգրկված էին`
- Սերժ Սարգսյան-Հայաստանի Հանրապետական կուսակցության նախագահ
- Գագիկ Ծառուկյան-«Բարգավաճ Հայաստան» կուսակցության նախագահ
- Լեւոն Տեր-Պետրոսյան-«Հայ Ազգային կոնգրես» դաշինքի նախագահ
- Արամ Սարգսյան-Հայաստանի դեմոկրատական կուսակցության նախագահ
- Վիկտոր Մարտիրոսյան-«Բնապահպանական ծրագրերի իրականացման գրասենյակ» պետական հիմնարկի պետ
- Վոլոդյա Խլոյան-Վարդենիսի քաղաքապետ
- Սամվել Դարբինյան-Վանաձորի քաղաքապետ
- Սոնա Ղարիբյան-Ֆինանասական վերահսկողության տեսչության պետ
- Կարեն Թամազյան-Լիցենզավորման գործակալության պետ
- Կարեն Խտրյան-Իրավական ակտերի փորձաքննության գործակալության պետ
- Աբրամ Բախչագուլյան-Սննդամթերքի անվտանգության պետական ծառայության պետ
- Լիլյա Վարդգեսյան-Ստեփան Շահումյանի անվան թիվ 1 դպրոցի տնօրեն
- Իրա Հակոբյան-Խաչատուր Աբովյանի անվան թիվ 2 դպրոցի տնօրեն
- Վահրամ Կիրակոսյան-«Երեւան Սիթի» սուպերմարկետների ցանցի տնօրեն
Բանախոսի համոզմամբ՝ «սեւ ցուցակում» ընդգրկված բոլոր 14 պաշտոնյաները անպատասխան են թողել հարցումները: «Սեւ ցուցակը» կազմվում է ամեն եռամսյակը մեկ, ամեն եռամսյակի վերջում Ինֆորմացիայի ազատության կենտրոնը հրապարակում է այն.
«Արդեն 2 տարին է՝ «սեւ ցուցակին» զուգահեռ կենտրոնը հրապարակում է նաեւ «սպիտակ ցուցակ»: Այստեղ ընդգրկվում են այն անձինք, ովքեր սեւ ցուցակում հայտնվելուց հետո որոշակի բարեփոխումներ են իրականացնում եւ ընդգրկվում են տարեկան «սպիտակ ցուցակում»:
Կարդացեք նաև
«Սպիտակ ցուցակում» հայտնվել էին`
- Լեւոն Խալիկյանը-ՀՀ էկոնոմիկայի նախարարության շուկայի վերահսկողության պետական տեսչության պետ
- Անահիտ Վարդանյան-Լ. Շանթի անվան թիվ 4 դպրոցի տնօրեն
Շուշան Դոյդոյանի պնդմամբ, ամենազայրացնողը դա հարցումներն անպատասխան թողնելն է, ժամկետների խախտումը կամ անհիմն ու թերի պատասխանների տրամադրումը: Այս ամենին բնորոշ են Ազգային ժողովի ու քաղաքապետարանի կողմից արված քայլերը.
«Նման ցուցակների գերնպատակը հանրային քննադատությունն է, քանի որ կառույցի հեղինակությունը սեւացվում է: Դրանից հետո անհնար է, որ կառույցները իրենց աշխատանքը չվերանայեն»:
Անժելա ՇԱՀՈՒՄՅԱՆ
