Քաղաքագետ Ռիչարդ Կիրակոսյանի գնահատմամբ, Ղարաբաղյան կոնֆլիկտի կարգավորման առումով քիչ բան է փոխվել: «Փոխվել է Ադրբեջանը, այն դարձել է ավելի անխոհեմ ու անկանխատեսելի, ինքն իրեն վնասող: Բավքում նախկին մարդասպանին ներում շնորհելը սեփական վարկը վնասող քայլ էր Ադրբեջանի կողմից ու նվեր էր Հայաստանի համար՝ եւս մեկ անգամ ապացուցելով, որ Լեռնային Ղարաբաղը այլեւս չի կարող վերադառնալ Ադրբեջանի կազմ»,- այսօր ասուլիսի ժամանակ ասաց պարոն Կիրակոսյանը:
Ըստ նրա, Հայաստանի արտաքին քաղաքականությունը ուժեղացել է, շնորհիվ ոչ թե Հայաստանի, այլ Ադրբեջանի սխալների, բայց. «Հայաստանը պետք է լինի ավելի նախաձեռնողական այդ ուժը պահպանելու համար»:
Անդրադառնալով հայ-ռուսական հարաբերություններին, ասաց, որ դրանք մնում են կայուն: Նա նաեւ նկատեց, որ Հայաստանը դարձել է ավելի կարեւոր անդամ՝ ՀԱՊԿ-ի անդամ, հատկապես, երբ ՀԱՊԿ-ն կորցրել է իր մեկ անդամին՝ Ուզբեկստանին:
Կարդացեք նաև
Պարոն Կիրակոսյանի գնահատմամբ, Հայաստանը շարունակում է մնալ ուժեղ դիրքերում նաեւ հայ-թուրքական հարաբերություններում. «Բոլոր սպասելիքները Թուրքիայից են եւ նրանից է նորմալ հարաբերությունների վերադառնալու ակնկալիքը»:
Ինչ վերաբերում է հայ-վրացական հարաբերություններին, պարոն Կիրակոսյանը կարծում է, որ վրացական նոր կառավարության դեպքում նպաստավոր պայմաններ են ստեղծվել Հայաստանի համար. Հայաստանը հիմա ունի հնարավորություն ավելի կայուն ու փորձառու երեւալու:
Հայ-իրանական հարաբերությունների հարցում էլ, քաղաքագետը գտնում է, որ Հայաստանը պետք է լինի զգույշ՝ հարաբերությունները զարգացնելու ու խորացնելու առումով:
Արփինե ՍԻՄՈՆՅԱՆ
