Այսօր Հայաստանի մարզական լրագրողների ֆեդերացիայի անցկացրած ավանդական հարցման արդյունքներով հրապարակվեց Հայաստանի 2012 թվականի 10 լավագույն մարզիկների ցուցակը, որը գլխավորեց Լոնդոնի օլիմպիական խաղերի արծաթե մեդալակիր, հունահռոմեական ըմբիշ Արսեն Ջուլֆալակյանը:
Հետաքրքիր զուգադիպությամբ այսօր «Sport de facto» ամսագիրը «Peoplemeter» ակումբում Արսենին հանձնեց տարվա լավագույն մարզիկի համար իր վարկածով մրցանակը: Այդ առիթով կազմակերպված լրագրողների հետ հանդիպման ժամանակ Արսեն Ջուլֆալակյանը, խոսելով այն մասին, թե իր համար անցնող տարին ինչպիսին էր, ասաց. «Յուրաքանչյուր մարզիկի համար իր երկրի լավագույն մարզիկ ճանաչվելը մեծ երջանկություն է ու նաեւ պարտավորեցնող: Ես այդ ցուցակում առաջին անգամ ընդգրկվել եմ 2007 թվականին` զբաղեցնելով 9-րդ հորիզոնականը: Դրանից հետո ամեն տարի բարձրացել եմ վեր` 7-րդ, 5-րդ, 3-րդ, 2-րդ եւ վերջապես այս տարի` 1-ին: Իմ նվաճումների համար շնորհակոլություն եմ հայտնում ընտանիքիս, եղբորս` Արամին, որը մեծ դերակատարություն է ունեցել իմ` օլիմպիական արծաթ նվաճելու գործում, մարզիչներիս` անձնական եւ ազգային հավաքականի: Սա մեծ թիմի աշխատանք է` միայնակ ոչնչի հնարավոր չէ հասնել: 2012-ն ինձ համար գերազանց տարի էր եւ մի փոքր պակասեց իդեալական լինելու համար: Նկատի ունեմ օլիմպիական ոսկե մեդալը: Հուսով եմ, որ 2016 թվականին Ռիո դե ժանեյրոյում այդ պակասը կլրացնենք: Այս տարին ինձ համար գերազանց է նաեւ ոչ միայն սպորտային, այլեւ անձնական կյանքի առումով` ամուսնացա: Սա եւս շատ կարեւոր է գործող մարզիկի եւ, ընդհանրապես, ցանկացած մարդու համար: Անձնականը շատ կարեւոր է, որովհետեւ նաեւ դրանից է բխում մասնագիտական հաջողությունը»:
Աշոտ ՀԱԿՈԲՅԱՆ
