Հայ ազգային կոնգրեսի մաս կազմող «Ժողովրդավարական հայրենիք» կուսակցությունն այսօր հրավիրել էր քաղխորհրդի նիստ, որի ընթացքում կուսակցությունը պետք է հստակեցներ իր անելիքները: Կուսակցության նախագահ Պետրոս Մակեյանը «Լրագրին» ասել էր. «Կքննարկենք, կոնգրեսից էլ կհասկանանք ինչ է անելու, որից հետո կարելի է հստակ ու բաց խոսել»:
Aravot.am-ը նիստի ավարտից հետո պարոն Մակեյանից հետաքրքրվեց՝ ի վերջո հստակեցրի՞ն իրենց անելիքները և ի՞նչ ճանապարհով են գնալու: Պ. Մակեյանը պատասխանեց. «Վերջնական որոշում ընդունելը թողեցինք հունվարի երկրորդ կեսին: Տեսնենք ինչ զարգացումներ կլինեն, ընդհանուր բոլոր փաստարկները կքննարկենք, որից հետո որոշում կընդունենք»:
Կարդացեք նաև
Մեր այն հարցին՝ արդյոք Լ. Տեր-Պետրոսյանի որոշումը նրանց վերջնական որոշման վրա ազդեցություն թողեց, պարոն Մակեյանն այսպես պատասխանեց. «Բնականաբար, այո, եթե Լևոն Տեր-Պետրոսյանը առաջադրվեր ուրիշ իրավիճակ կլիներ, այս նոր իրավիճակում մենք փորձում ենք ընդմիջում տալ և նոր տարին անցնելուց հետո սառը ուղեղով կփորձենք հասկանալ և որոշում ընդունել»:
Մեր այն դիտարկմանը, թե հաշվի առնելով, որ ՀՀ նախագահական ընտրությունները 2013-ի փետրվարի 18-ին են, ուշ չի՞ լինի հունվարի երկրորդ կեսին ընդունված որոշումը, Պ. Մակեյանը պատասխանեց. «Ուշ չի լինի: Ամեն ինչ հաշվարկված է»:
Պ. Մակեյանը մեզ տեղեկացրեց, որ քաղխորհրդի նիստում քննարկվել է նաև Կոնգրեսի հարցը, որի հետ կապված որոշումը կրկին կլինի հունվարին:
Մեր այն հարցին, թե արդեն խոսում են ՀԱԿ-ի կազմաքանդման մասին, արդյոք այսպիսի բան հնարավոր է, պարոն Մակեյանն այսպես պատասխանեց. «Մեր կուսակցությունը գտնում է, որ Կոնգրեսը պետք է մնա, քանի որ ներքաղաքական զարգացումները այնպիսին են, որ միշտ հնարավոր է ֆորսմաժորային իրավիճակ և այդ պարագայում Կոնգրեսի գոյությունը ճիշտ է»:
Զրույցի վերջում պարոն Մակեյանին հարցրինք՝ Լ. Տեր-Պետրոսյանի որոշումը ՀԱԿ-ին փաստի առաջ կանգնեցրե՞ց: Նա պատասխանեց. «Կարծես թե մեր կուսակցությունում նման մոտեցում չկա, ինչ որ չափով նաև սպասելի էր այդ որոշումը»:
Տաթև ՀԱՐՈՒԹՅՈՒՆՅԱՆ
