«Այս տարվա ապրիլ ամսից «Միացյալ Երիտասարդական Լիգա» (ՄԵԼ) շարժումն անցկացրել է ստորագրահավաք` ընդդեմ քայքայիչ աղանդների գործունեության»,-Aravot.am-ի հետ զրույցում ասաց ՄԵԼ համանախագահ Դանիել Պետրոսյանը: Նա նշեց, որ շուրջ 10.000 ստորագրություն նոյեմբերի 25-ին ներկայացրել են ՀՀ նախագահի աշխատակազմին եւ մեկ ամիս անց արդարադատության նախարարության կողմից ստացել պատասխան. «Նախարարությունը վստահեցրել է, որ մշակվում է նախագիծ, համաձայն որի` սահմանվում է հոգեորսությունը, իսկ ՀՀ քրեական օրենսգրքում ստեղծվում է պատիժներ սահմանող հոդված: Իսկ թե երբ նախագիծը կյանքի կկոչվի, դեռեւս պարզ չէ»:
Պետրոսյանի խոսքով. «Հոգեորսություն իրականացնողների դեմ պետք է վերահսկողություն սահմանվի: Այսքան ժամանակ չեն գրանցվել դեպքեր, երբ քրեական գործ հարուցվի հոգեորսության համար: Այդ պատճառով պետք է ստեղծել վերահսկողություն իրականացնող մի մարմին: Կրոնական ոստիկանություն ստեղծելու առաջարկը մերժել էր ՀՀ ոստիկանությունը` ասելով, որ գործառույթը կարող են կատարել ՀՀ ոստիկանական ուժերը: Սակայն կրոնական ոստիկանությունն անհրաժեշտ է, որպեսզի հոգեւոր դաշտում տեղի ունեցող անօրինականությունները եւ սպանությունները չվերագրվեն որպես կենցաղային: Ֆրանսիայում կա եւ ոստիկանություն, եւ կրոնական ոստիկանություն»:
Մեր զրուցակիցը հավելեց, որ կրոնական ոստիկանություն ստեղծելու առաջարկով դիմելու են կառավարությանը:
Կարդացեք նաև
Լուիզա ՍՈՒՔԻԱՍՅԱՆ
