«Իսկ Սերժ Սարգսյանը երբեւիցե վստահության քվե ունեցե՞լ է, որ նախագահ է դարձել: Նա չի ունեցել,վստահեցնում եմ՝ հիմա առավել եւս չունի: Հանրապետականներն ասում են մի շատ կարեւոր բան, որ նույնիսկ բացարձակ վստահություն չունենալու դեպքում, իրենք կարողանում են կեղծել ընտրությունները: Իսկ Լեւոն Տեր-Պետրոսյանը բավարար չափով վստահության քվե ունի, բավականին ունակ մարդ է, որ իրավիճակը ճիշտ գնահատի»,- Aravot.am-ի հետ զրույցում ասաց ԱԺ ՀԱԿ պատգամավոր Լյուդմիլա Սարգսյանը՝ հակադարձելով ՀՀԿ-ական պատգամավոր Հովհաննես Սահակյանին: Հիշեցնենք, պարոն Սահակյանը երեկ մեղադրել էր ՀԱԿ առաջնորդին ժողովրդի վստահության քվեն անմարդկային ու անխնա մսխելու մեջ:
«Երեւի թե Հովհաննես Սահակյանը կարծում է, թե ամբողջ ժողովուրդը կարոտով Սերժ Սարգսյանի ձայնն է լսում: Վստահեցնում եմ, որ նման բան չկա: ժողովրդի համար շատ ավելի նախընտրելի է Տեր-Պետրոսյանի ձայնը լսել, գոնե ինչ-որ մի բան կարող են իրենց համար ուսուցողական համարել, քան Սերժ Սարգսյանի: Վստահեցնում եմ, որ Լեւոն Տեր-Պետրոսյանը նույն չափով պահանջված է, ինչպես 2008-ին էր: Նրանց միակ խնդիրը ամեն ինչ անելն էր, որ Լեւոն Տեր-Պետրոսյանը չառաջադրվի, որովհետեւ վարչախմբի ռեսուրսներին միակ մրցակիցը Լեւոն Տեր-Պետրոսյանն է: Դրա համար ամեն ինչ արեցին՝ Տեր-Պետրոսյանի առաջադրվելը խափանելու համար»,- շարունակեց տիկին Սարգսյանը՝ անդրադառնալով Հ. Սահակյանի այն դիտարկմանը, թե ՀԱԿ առաջնորդ Լեւոն Տեր-Պետրոսյանը 2013 թվականը շփոթել է 2008-ի հետ, այն ժամանակ 10 տարի նա չէր խոսել ու որոշակի հատված կարոտել ու սպասում էր իր խոսքին, բայց ոչ հիմա:
«Հովհաննես Սահակյանը փորձում է ամեն ինչ լղոզել: Իսկ եթե ինքը կարող է հիմնավորել, թե 2013-ն ինչու է ավելի վատը, քան թե 2008-ը, ապա պետք է գոնե մեզ կարողանա համոզել, որ 2013-ին Սերժն ավելի լավն է, քան 2008-ին էր: Իսկ ես վստահ եմ, որ Սերժ Սարգսյանն ընդհանրապես առաջադրվելու բարոյական իրավունք չուներ , որովհետեւ տապալել է ամեն ինչ՝ արտաքին քաղաքականությունից սկսած մինչեւ տնտեսական քաղաքականություն, մարդկանց տրամադրությունը վակումային դարձրեց, արտագաղթը մեծացրեց: Եթե նա այդքան լավ նախագահ է, ինչո՞ւ է հայը փախչում հայրենիքից, այդ հարցն եմ ուզում ուղղել Հովհաննես Սահակյանին եւ խորհուրդ տալ այդքան մեծամիտ ու ինքնավստահ չլինել, հատկապես որ իրենց թեկնածուն ոչ մի առումով մրցակցային չէ»,- հավելեց ՀԱԿ պատգամավորը:
Կարդացեք նաև
Արփինե ՍԻՄՈՆՅԱՆ
