Տոնական օրերին ալկոհոլ օգտագործած վարորդների նկատմամբ ներում-բեկում չի լինելու: Նրանք, ըստ Ճանապարհային ոստիկանության փոխգնդապետ Արսեն Արշակյանի, պատժվելու են օրենքի ամբողջ խստությամբ:
«Ոչ մի ներում-բեկում չի լինելու, բայց, ի տարբերություն նախորդ տարիների, վարորդը, որը օգտագործած կլինի ալկոհոլ, միայն կենթարկվի վարչական պատասխանատվության, այսինքն՝ մեքենան տուգանային հրապարակ չի տեղափոխվի, որ մեքենայում գտնվող ուղեւորները դրանից չտուժեն»,- այսօր «Ֆորում» ակումբում ասաց պարոն Արշակյանը:
Պարոն Արշկայանը նաեւ ասաց, որ այս տարի տեղադրված արագաչափերի ու տեսախցիկների շնորհիվ նվազել են ավտոտրանսպորտային վթարները Երեւանում: Ըստ նրա՝ դեկտեմբերի 24-ի դրությամբ, նախորդ տարվա նույն ժամանակահատվածի համեմատ, դեպքերը նվազել են 12-ով, մահերը՝ 5-ով, իսկ վիրավորները՝ 2-ով. «Այսինքն՝ այս տարի գրանցվել է 67 դեպք՝ 2 մահ, 90 վիրավոր»:
Նա նաեւ տեղեկացրեց, որ 43 արագաչափ սարքերից 37-ը Երեւանում են տեղադրված, իսկ խաչմերուկներում 35 տեսանկարահանող սարք կա արդեն:
Կարդացեք նաև
Արփինե ՍԻՄՈՆՅԱՆ
