Այսօր Հայաստանի նկարիչների միությունում բացվեց Խ. Աբովյանի անվան հայկական պետական մանկավարժական համալսարանի (ՀՊՄՀ) Գեղարվեստի ֆակուլտետի նկարչական բաժնի հիմնադիրների, դասախոսների, շրջանավարտների եւ ուսանողների ցուցահանդեսը: Այն նվիրված էր ՀՊՄՀ-ի 90-ամյակին:
Ներկայացված էին մասնավորապես բուհի նկարչական բաժնի ստեղծողների` Հովհաննես Զարդարյանի, Ղուկաս Չուբարյանի, Էդուարդ Իսաբեկյանի, Վահրամ Խաչիկյանի, Արտաշես Հունանյանի եւ Հմայակ Ավետիսյանի աշխատանքները:
«Այս մարդիկ այսօր հանրապետությունում ճանաչված նկարիչներ են, Հայաստանի նկարիչների միության անդամներ են: Ինչպես գիտեք`գեղագիտական կրթությունը մարդու զարգացման կարեւորագույն օղակներից մեկն է»,- նշեց արվեստի վաստակավոր գործիչ, պրոֆեսոր Արկադի Շեկունցը:
Ցուցահանդեսին ներկա էր նաեւ ՀՀ ԿԳ նախարար Արմեն Աշոտյանը: Նա ասաց, որ շատ է խոսվում գիտելիքի կարեւորության եւ գիտելիքահեն հասարակության ստեղծման մասին, նաեւ նշեց, որ միայն գիտելիքը մերկ եւ անիմաստ զենք է, եթե չունի արժեք. «Արժեքները ստեղծվում են մշակութային կյանքի եւ գործունեության շնորհիվ: Կրթությունը եւ մշակույթը նույն շքանշանի երկու երեսներն են: Կարծում եմ, որ կիրթ մարդը միաժամանակ պետք է լինի մշակութային դաստիարակություն ստացած մարդ, իսկ այդ մարդը նախեւառաջ պետք է լինի կիրթ մարդ: Ուրախ եմ, որ այսօր կրթական օջախներից մեկը` Հայաստանի պետական մանկավարժական համալսարանը մեր հասարակությանն է «մատուցում» նման նկարիչների, ինչպես նաեւ ուսանողների աշխատանքները»:
Կարդացեք նաև
Մարզպետ Խուդավերդյանը սովորում է ՀՊՄՀ-ի Գեղարվեստական կրթության ֆակուլտետի երրորդ կուրսում: Ցուցահանդեսին ներկայացրել էր մեկ աշխատանք` «Դաշտային ծաղիկներ» վերնագրով: Ասաց, որ գեղանկարի վրա աշխատել է մեկ շաբաթ:
Նաիրի Բալաբեկյանը նույնպես Գեղարվեստական կրթության ֆակուլտետի ուսանող է: Սովորում է գծագրության եւ կերպարվեստի բաժնի չորրորդ կուրսում: Նա նշեց. «Ներկայացրել եմ մեկ գեղանկար, որի վրա աշխատել եմ ջրաներկով եւ խառը տեխնիկայով»:
Արամ ԱՐԱՐԱՏՅԱՆ
