Այսօր վճռաբեկ դատարանը մերժեց Աշոտ Չտրկյանի բողոքը, որը մեղադրվում է պետական դավաճանության օժանդակության հոդվածով եւ դատապարտվել 10-ը տարի ազատազրկման: Aravot.am-ի հետ զրույցում Չտրկյանի պաշտպան Հարություն Բաղդասարյանը նշեց, որ վճռաբեկ դատարանը բողոքը վերադարձրել է՝ պատճառաբանելով, թե այն անհիմն է, հետեւաբար վարույթ չի ընդունվի, մինչդեռ. «Դատարանը պետք է պատճառաբանի, թե ինչու չի ընդունում, բայց նա գրել է, որ չի համապատասխանում եւ վերջ: Իսկ թե ինչը չի համապատասխանում, դե արի ու էշը ցեխից հանի, ոնց անես, որ համապատասխանի»:
Բաղդասարյանի փոխանցմամբ՝ 414 պրիմ 2 հոդվածը նախատեսում է այն հիմքերը, որով վճռաբեկ բողոքը կարող է վարույթ ընդունել: Բացի այդ, ըստ նրա՝ կարեւորն այն հանգամանքն է, որ այս արարքը որպես պետական դավաճանություն, պետք է կարողանա համապատասխանել Հայաստանի քրեական օրենսգրքի 299 հոդվածով նախատեսված հատկանիշներին, եւ Ղարաբաղի դեմ ուղղված արարքը չէր կարող ՀՀ քրեական օրենսգրքով դատապարտվել. «Մենք ունենք հիմք, եւ վճռաբեկ դատարանը կարող էր նորմալ պատճառաբանությամբ ստեղծել լուրջ դատական նախադեպ, որ վաղը չէ մյուս օրը չիրականացվեր այսպիսի գործողություններ: Ղարաբաղի դեմ ուղղված գործողությունը Հայաստանի Հանրապետության քրեական օրենսգրքով չպետք է դատապարտվեր, որովհետեւ այս դեպքում, հարց է առաջանում, բա Լեռնային Ղարաբաղի քրեական օրենսգրքով ինչ է դատապարտում»:
Բաղդասարյանը կարծում է, որ «Չտրկյանի գործն» էլ «Մատաղիսի գործի» նման է լինելու, դատապարտվողն անմեղ է ու տարիներ անց դա բացահայտվելու է: «Վճռաբեկ դատարանը դատական ատյան չէ: Բողոքը վերադարձնելով դատարանը չի կարող իրականացնել արդարադատություն եւ այս քայլը հակասում է Սահմանադրության 92 հոդվածի դրույթներին: Եթե բողոքը վերադարձվում է՝ նշանակում է չի իրականացվում արդարադատություն»,- նշեց Բաղդասարյանը, որի խոսքով դատարանը արդարադատություն իրականացնելուց հրաժարվելու իրավունք չունի:
Կարդացեք նաև
Հավելենք նաեւ, որ 10 տարի ժամկետով ազատազրկված Աշոտ Չտրկյանի մայրը՝ Անահիտ Չտրկյանը, արդարադատության համակարգի ցուցաբերած սխալի ու որդու անմեղությունը հաստատելու պահանջով 14 օր է նստացույց է անում նախագահի նստավայրի առջեւ:
Եվա ՀԱԿՈԲՅԱՆ
