«Gallup»-ի վերջին հարցումների համաձայն, նախագահական առաջիկա ընտրություններին քաղաքացիների միայն 2 տոկոսը կքվեարկեր ՕԵԿ նախագահ Արթուր Բաղդասարյանի օգտին, եթե նա առաջադրվեր: Ու քանի որ ՕԵԿ փոխնախագահ Հեղինե Բիշարյանը մշտապես հպարտանում է իրենց կուսակցության նախագահի բարձր վարկանիշով ու պնդում է, որ իրենց ղեկավարը ժողովրդի կողմից սիրված ու գնահատված է, Aravot.am-ը նրանից հետաքրքրվեց՝ «Gallup»-ի հարցումներից հետո մտավախություն չունե՞ն, որ Արթուր Բաղդասարյանի վարկանիշը կտրուկ ընկել է: «Gallup»-ի հարցումներին այնքան էլ լուրջ չեմ վերաբերվում, որովհետեւ ես շատ լավ գիտեմ, թե այդ սոցիոլոգներն ինչ մոտեցումներով են առաջնորդվում: Միշտ տեսել ենք, որ նրանց արդյունքները կամ նախապես պայմանավորված արդյունքներ են կամ էլ իրականությանը չեն համապատասխանել»,- ասաց տիկին Բիշարյանը:
Մեր հարցին, թե ՀՀԿ թեկնածու գործող նախագահին վերաբերող ցուցանիշն է՞լ է նախապես համաձայնեցված ու իրականությանը չի՞ համապատասխանում, տիկին Բիշարյանն ասաց. «Դրա մասին չէ խոսքը: Այսօր նախագահական ընտրությունների մասնակցող թեկնածուների ցանկում միակ հաղթող թեկնածուն Սերժ Սարգսյանն է, սա լրիվ ուրիշ բան է, սրա հետ հաշվի պիտի նստենք»:
Արփինե ՍԻՄՈՆՅԱՆ
