Անի Քոչարը թոշակի անցնել դեռ չի պատրաստվում
Ավելի քան երեք տարվա դադարից հետո նա կրկին մասնակցեց նորաձևության ցուցադրության: Ամուսնությունից և բալիկ ունենալուց հետո «LHarmony» նորաձևության տան ցուցադրությունը նրա առաջին բեմելն ու վերադարձն էին:
Կարդացեք նաև
«Անկեղծ ասած շատ անակնկալ կերպով եղավ վերադարձս, որի մասին որոշումը կայացրել եմ ցուցադրությունից հաշված օրեր առաջ: Լինելով չափազանց զգացմունքային` հուզական որոշում եմ կայացրել. պարզապես կարոտել էի պոդիումը, նորաձևության աշխարհն ու այն հուզումները, որ ունենում եմ բեմում և բեմ բարձրանալիս: Ես բոլորովին այլ կերպ եմ վերաբերում այդ ամենին: Նորաևությունն ինձ համար արվեստ է, իսկ ես, որպես մանեքենուհի, այն մատուցողներից մեկը: Իհարկե, մտավախություն ունեի` արդյոք ամեն բան լավ կստացվի՞, քանի որ դադարս փոքր-ինչ երկար տևեց, և ոմանց համար ես այլևս նախկին մանեքենուհի էի»,- անկեղծացավ Անին:
Քոչարը մանեքենուհու կարիերան սկսել է 2000-ականներին, մասնակցել է հարյուրավոր ցուցադրությունների Հայաստանում և Հայաստանի սահմաններից դուրս, եղել է մի շարք ապրանքանիշերի դեմք, բայց այդ ամենը կարծես անցյալում էր, և թվում էր, թե Անին այլևս չի ներկայանա որպես մանեքենուհի: Բայց նա, ինչպես միշտ, անկանխատեսելի է:
Արդյոք սա մեծ վերադարձ է. այս հարցին ի պատասխան` Անին նշեց, որ չի կարող միանշանակ ասել, և որ ամեն բան ժամանակը ցույց կտա, քանի որ միայնակ որոշում կայացնել չի կարող: Եթե պահանջարկ լինի, ստանա լավ առաջարկներ, գուցե և շարունակի աշխատել նաև որպես մոդել:
«Մեր երկրում, ցավոք, հաճախ չեն կազմակերպվում նորաձևության ցուցադրություններ, և հեղինակավոր հայ փոքրաթիվ մոդելավորողները չեն կարող ամեն շաբաթ կամ ամիս ցուցադրություններ ունենալ: Փոքր երկրում էլ փոքրիկ նորաձևության ինդուստրիա է, եթե կարելի է այդպես ասել, այնպես որ հաճախ հանդես չեմ գա, բայց ինպես նշել էի վերջերս տված հարցազրույցներից մեկում, ես ինձ նախկին մանեքենուհի չեմ համարում և թոշակի անցնելու համար կարծում եմ` դեռևս վաղ է: Ինձ հետաքրքիր է այսօրվա «ֆեյշն» ոլորտը, այն շատ տարբերվում է 10 տարի առաջվանից, երբ ես ամենապահանջարկված և շատ աշխատող մոդելներից էի: Ես ցանկանում եմ ինձ համար բացահայտել նաև այսօրվա` արդի ասպարեզը:
Շնորհակալ եմ հայ լավագույն մոդելագործներից մեկին` Միքայել Դանիելյանին, որ ինձ հիշեցրեց իմ կոչումներից մեկի մասին և առիթ տվեց թարմացնելու ինձ համար շատ կարևոր զգացողությունները: Վերջին ցուցադրությունն ու համագործակցությունը եղել էր «Զատիկ» հայկական հեղինակավոր ապրանքանիշի հետ. այնպես որ հացրել էի մի լավ կարոտել մոդելային իրարանցումն ու պոդիումի շնորհած հուզմունքը»,- եզրափակեց Անի Քոչարը:
