Aravot.am-ը ճանաչված խմբավար, Երեւանի Կոմիտասի անվան պետական կոնսերվատորիայի պրոֆեսոր Տիգրան Հեքեքյանին խնդրեց մեկնաբանել, թե ինչպիսի տարի էր 2012 թվականը՝ երեխաների հոգեւոր եւ ներդաշնակ զարգացման առումով:
«Անկեղծ ասած, թե երեխաների համար արտառոց ինչ է արվել Հայաստանում 2012-ին, դժվարանում եմ ասել: Թվացյալ կարծես շատ բան է արվում՝ ծրագրեր, մտահղացումներ, գումարի հատկացում, գոնե երաժշտության բնագավառում արվում է: Հարցը, սակայն, այն է, թե ինչպես են օգտագործվում այդ միջոցները՝ միջին եւ ստորին շերտերում: Ես գիտեմ, որ բավականին գումար հատկացվում է պետական բյուջեից՝ երեխաների երաժշտական կրթության համար, եւ քաղաքապետարանն է սուբսիդավորում երաժշտական դպրոցները, որպեսզի ծնողները ոչ թե վճարեն 13000 դրամ՝ մեկ աշակերտի համար, այլ մուծեն 2000-7000: Գիտեմ, որ պետպատվերով կառավարությունը վճարում է գումար, որպեսզի անվճար դառնա այն գործիքների ուսուցումը, որոնցով քիչ են հետաքրքրված: Ընդ որում, մի քանի 100 մլն դրամ գումարի մասին է խոսքը, եւ անվճար ուսուցանվում են ժողովրդական, փողային , նույնիսկ որոշ լարային գործիքներ: Գիտեմ նաեւ, որ հաճախ այդ փողերը ոչ նպատակային են օգտագործում շատ տնօրեններ, կառույցներ, կազմակերպություններ, ինչի պատճառով տուժում են բարեխիղճ աշխատող դպրոցները: Օրինակ՝ գումարներ են հատկացվում վարպետաց դասերի համար, բայց դրանք հաճախ անցկացնում են մասնագետներ, որոնք իրենք վարպետաց դասերի կարիք ունեն»,- ասաց պարոն Հեքեքյանը:
Նրա ձեւակերպմամբ՝ «միջին եւ ստորին մասում գումարները ծախսում ենք անփութորեն, անիմաստ, եւս մեկ խաչ դնելու համար»:
Կարդացեք նաև
Ճանաչված խմբավարը հայտարարում է. «Կարծում եմ, որ 2013-ին պետք է լրջորեն վերահսկվեն եւ բաշխվեն գումարները, որովհետեւ ափսոս են, նույն գումարներով մենք կարող ենք հասնել ավելի մեծ արդյունքի»:
Ինչ վերաբերում է իր ղեկավարած «Հայաստանի փոքրիկ երգիչներին», Տիգրան Հեքեքյանի ասելով, այս տարին բեղուն տարի է եղել, ունեցել են 2 շրջագայություն՝ մեկը Վրաստան, Լատվիա, Շվեդիա, մյուսը Ճապոնիա: Առաջինի ճանապարհածախսի համար միջոցներ են տրամադրվել պետբյուջեից, ու մաեստրոն կարծում է, որ դա փոխհատուցել են հեղինակավոր փառատոնում ու այդ երկրներում Հայաստանը հավուր պատշաճի ներկայացնելով:
Ինչ վերաբերում է ճապոնական շրջագայությանը, բոլոր ծախսերը՝ շուրջ 1մլն դոլար, հոգացել է հրավիրող կողմը: Համերգները փառահեղ են անցել՝ Ճապոնիայում Հայաստանի դեսպանատունը շարունակում է արձագանքներ ստանալ, որոնց հեղինակները հետաքրքրված են Հայաստանով, ՀՀ մշակույթի նախարարությունն էլ շնորհակալական նամակ է ստացել: Գովեստներում զուսպ, խստապահանջ ու մշակույթի առումով նրբաքիմք ճապոնացիները «Հայաստանի փոքրիկ երգիչները» անվանել են ազգային հարստություն: «Հայաստանի փոքրիկ երգիչները» իր ուժերով նաեւ միջազգային մրցույթ է անցկացրել, արդյունքում 25 կոմպոզիտոր աշխարհի տարբեր երկրներից՝ խմբի համար ստեղծագործություններ է գրել, դա նշանակում է, որ 1000-ավոր երաժիշտներ «Հայաստանի փոքրիկ երգիչների» միջոցով տեղեկացել են Հայաստանի մասին:
Գոհար ՀԱԿՈԲՅԱՆ
