Աժ ՀՀԿ խմբակցության պատգամավոր Արտակ Զաքարյանի կարծիքով, Եվրասիական միություն եւ Եվրոպական միություն ինտեգրվելու շրջանակներում Հայաստանի որդեգրած քաղաքականությունը հակասությունների խնդիրներ չունի:
«Հայաստանի համար Եվրոպական միություն ինտեգրումը առաջնահերթություններից է եւ երկարաժամկետ նպատակադրումներով իրականացվել են կոնկրետ քայլեր»,- այսօր ասուլիսի ժամանակ ասաց պարոն Զաքարյանը:
Անդրադառնալով Հայաստանում ԵՄ խորհրդատվական խմբի ղեկավար Ոլիեմ վան դեր Գիստնի հայտարարությանը, թե Հայաստանը հնարավոր է անդամակցի Եվրասիական միությանը, բայց որոշակիորեն, որովհետեւ Եվրասիական միության մեջ կան որոշ բաղադրիչներ, որոնք հակասում են ԵՄ-ի հետ համագործակցությանը եւ կգա մի պահ, երբ Հայաստանը պետք է սահմանի իր գերակայությունները, թե տարբեր ոլորտներում ում հետ է ուզում լինել, պարոն Զաքարյանն ասաց, որ ԵՄ ներկայացուցչի մատնանշած մաքսային խնդիրները հետագայի խնդիր է, իսկ Հայաստանը կամ- կամի դեպքում կողմնորոշվելու է պետական շահերի առաջնայնությամբ. «Առաջնորդվելու ենք մեր պետության շահերով: Եթե կամ- կամի խնդիր կդնեն, ապա այդ դեպքում, ինչպես ընդունված է , պետք է գերակշռեն ազգային պետական շահերը»: Նա ասաց, որ ընտրություն կատարելու առումով Հայաստանի համար ցանկացած ինտեգրման գործընթաց առաջինը տնտեսական շահի առաջնահերթությամբ է պայմանավորված:
Կարդացեք նաև
Հայ-թուրքական հարաբերությունների սառեցման գործընթացի մասին էլ ասաց, որ երկկողմանի ստորագրված փաստաթղթերը դեռ վաղ է արխիվ ուղարկել, դրանք չեն կորցրել կենսունակությունը. «Հայաստանը շարունակելու է հետեւել Թուրքիայի՝ այդ ուղղությամբ իրականացրած քայլերին, որովհետեւ դրանք նաեւ ամբողջ տարածաշրջանում աճող լարվածությունը թուլացնելու գործողություններ են»:
Արփինե ՍԻՄՈՆՅԱՆ
