ՀՀԿ խմբակցության քարտուղար Հովհաննես Սահակյանի համոզմամբ, ՀԱԿ առաջնորդ Լեւոն Տեր-Պետրոսյանը 2013 թվականը շփոթել է 2008-ի հետ, երբ տասը տարվա ընթացքում չէր խոսել ու որոշակի հատված կարոտել ու սպասում էր իր խոսքին:
«Բայց անցնող 5 տարիների ընթացքում այն վստահության քվեն , որ ժողովուրդը ավանսով տվել էր ՀԱԿ-ի առաջնորդ Լեւոն Տեր-Պետրոսյանին, տեսանք, որ ոչ միայն անխնա, այլեւ անմարդկային ձեւով մսխեցին»,- այսօր «Սլաք» ակումբում ասուլիսի ժամանակ պատասխանելով Aravot.am-ի հարցին ասաց պարոն Սահակյանը:
Նրա դիտարկմամբ, կարելի է ասել, որ առաջին նախագահը լիկվիդ մնաց՝ խուսափելով հանձնել քննությունը. «Լիկվիդը մնում է երկու պարագայում՝ միտումնավոր կամ հիվանդության պատճառով, թուղթ են բերում ու չեն մասնակցում: Պատճառը թողնենթ ռեկտորատին, հետո որոշեն»: Հետո էլ ծիծաղելով հավելեց՝ ռեկտորատը ժողովուրդն է:
Կարդացեք նաև
Նրա գնահատմամբ, ՀԱԿ-ին չի վստահում ժողովուրդը եւ ՀԱԿ-ի տարբեր անդամների տարբեր շեշտադրումներով միմյանց հակադարձելն էլ արդեն վատ նշան է:
Պարոն Սահակյանի դիտարկմամբ, ՀՀԿ-ն ամեն հնարավորություն ու պայման ստեղծել է ընդդիմության ուժերը համախմբելու. «Այս տեսանկյունից ՀՀԿ-ին չպետք է մեղադրեն»:
Արփինե ՍԻՄՈՆՅԱՆ
