«Ես միշտ ասել եմ, որ առաջին նախագահը խորիմաստ քաղաքական գործիչ է»,- Aravot.am-ի հետ զրույցում ասաց «Հայրենիք ու պատիվ» կուսակցության քաղխորհրդի անդամ Վարդան Մալխասյանը` կիսելով իր տպավորությունները ՀՀՇ համագումարում ՀԱԿ առաջնորդ, ՀՀ առաջին նախագահ Լեւոն Տեր-Պետրոսյանի ելույթից: Վարդան Մալխասյանին չի ընկճել Տեր-Պետրոսյանի` առաջիկա նախագահական ընտրություններին մասնակցության հստակեցումների համար մի քանի օր էլ սպասելու հորդորը. «Ես միշտ ասել եմ ու էլի եմ ասում` քաղաքականության մեջ անշտապ համառությունը միշտ հաղթում է վայրենի, բարբարոս ուժին: Հանգամանորեն, մշակված, վերլուծված ծրագիրը հաղթում է չարիքի իշխանությանը: Ինքն այդ մոտեցումներով է առաջ գնում ու ճիշտ է անում: Ինչո՞ւ շուտ խաղաքարտերը բացենք: Տեսնենք, դաշտը թող մի քիչ տակնուվրա լինի, նոր կբացենք»:
Հարցին, եթե այնուհանդերձ, առաջին նախագահը չառաջադրվելու մասին որոշում ընդունի, Մալխասյանը հակադարձեց. «Չի կարող չառաջադրվել: Այսքան ժողովուրդը, հայ ժողովուրդը ամբողջ հույսը կապել է իր հետ, ո՞նց կարող է ինքը չառաջադրվի»:
Հիշեցնենք, որ «Հայրենիք ու պատիվ» կուսակցությունն, ըստ կուսակցության նախագահ Գառնիկ Մարգարյանի, թեեւ դեռ ՀԱԿ-ի կազմում է, սակայն մեկ տարի է ինչ չի մասնակցում ՀԱԿ-ի աշխատանքներին: Ի դեպ, Գառնիկ Մարգարյանը ՀՀՇ համագումարին ներկա չէր:
Նելլի ԳՐԻԳՈՐՅԱՆ
Կարդացեք նաև
