Արտո Թունջբոյաջյանի «Արարատ» երգի ներքո եւ Տերունական աղոթքով ու օրհներգով քիչ առաջ հայտարարվեց «Ժառանգության» համագումարը: Րաֆֆի Հովհաննիսյանը, ինչպես միշտ, ողջագուրվեց համագումարին ներկա բոլորի հետ, հարցրեց որպիսությունը:
Համագումարի մասնակիցներին բաժանվել էին Րաֆֆի Հովհաննիսյանի լուսանկարով օրացույցներ, որոնց վրա գրված էին կարգախոսներ՝ «Մեկ անգամ: Միասին» եւ «Ազատ, անկախ, միացյալ»: Aravot.am -ը Րաֆֆի Հովհաննիսյանին հարցրեց՝ մեկ անգամ, միասին ասելով ի՞նչ նկատի ունեք, ի՞նչ եք մեկ անգամ անելու՝ նա պատասխանեց. «Կերեւա: Իմ կարգախոսն է՝ մեր ճակատագիրը մեր ժողովրդի ձեռքում է, մեր ձեռքում է մեր ապագան: Կարգախոսները շատ են Դրա համար փետրվարի 18-ին մեկ անգամ, միասին պիտի փոխենք երկիրը»:
Մենք հետաքրքրվեցինք՝ սարերը շուռ տալու խոստումը դեռ ուժի մե՞ջ է՝ նա պատասխանեց, որ ուժի մեջ է եւ իրենք դեռ շուռ են տալու սարեր:
Րաֆֆի Հովհաննիսյանը լրագրողների հետ զրույցում նաեւ ասաց, որ բոլորն իր համար մրցակից են: Հարցին՝ մտավախություն չունե՞ք, որ դարձյալ վարչական ռեսուրսներ կօգտագործվեն՝ նա պատասխանեց, որ դրանք մշտական հավանաբար կլինեն, բայց «Մենք դրա դեմը պիտի առնենք: Փետրվարի 18-ը պիտի լինի ոչ միայն անցյալի տոնակատարություն, այլ նաեւ ապագայի տոնակատարություն»:
Կարդացեք նաև
Հարցին, թե ումի՞ց եք ակնկալում աջակցություն՝ նա պատասխանեց, որ այն քաղաքական ուժերից, որոնք հավատում են ազատ, անկախ, միացյալ Հայաստանին. «Դա ոչ միայն Սփյուռքն է, Արեւմտյան եւ Արեւելյան Հայաստանը, այլ միացյալը հայ մարդն է, Հայաստանի քաղաքացին է, ովքեր ուզում են մասակցել Հայաստանի հաղթանակին»:
Հռիփսիմե ՋԵԲԵՋՅԱՆ
