Հայաստանի մինչեւ 23 տարեկան բռնցքամարտիկներից երեքը Կալինինգրադում անցկացված Եվրոպայի երիտասարդական առաջնությունում նվաճեցին մեկական ոսկի, արծաթ եւ բրոնզ: Aravot.am-ին պատմելով, թե նրանցից յուրաքանչյուրը մինչեւ պատվո պատվանդան հասնելն ինչ ճանապարհ է հաղթահարել, հավաքականի գլխավոր մարզիչ Կարեն Աղամալյանն ասաց. «Մեր տղաները ցույց տվեցին, որ կամքի ուժ ունեն եւ մինչեւ վերջ պայքարում են հաղթանակի համար: Այս առաջնությունում հանդես էին գալիս հիմնականում իրենց ազգային հավաքականների առաջին համարները:
Չեմպիոնի կոչումը նվաճած Կորյուն Սողոմոնյանը նախնական փուլերը հաղթահարելով` կիսաեզրափակչում 3 միավորի տարբերությամբ առավելության հասավ ռուսաստանցի շատ ուժեղ մրցակցի նկատմամբ, իսկ եզրափակչում համառ պայքարում մեկ միավորով հաղթանակը պոկեց իռլանդացուց, որը կոշտ բռնցքամարտին է դավանում: Արծաթե մեդալակիր դարձած Արամ Ավագյանը ¼ եւ 1/2 եզրափակիչներում հաղթեց աշխարհի երիտասարդների չեմպիոնների` համապատասխանաբար, անգլիացի եւ ադրբեջանցի: Իսկ բրոնզե մեդալակիր Արայիկ Աբգարյանը կիսաեզրափակչի համար մարտում պայքարից դուրս թողեց օլիմպիական խաղերի մասնակից՝ բուլղարացի Ստեֆան Իվանովին, որին ուղիղ մեկ տարի առաջ Թուրքիայում անցկացված Եվրոպայի առաջնությունում պարտվել էր միավորների մեծ տարբերությամբ: Այնպես որ, մեր տղաներն արդեն ապացուցում են, որ կամքի ուժ ունեն եւ պայքարում են հաղթելու համար»:
Աշոտ ՀԱԿՈԲՅԱՆ
