2008-2012 թվականներին «Հարավկովկասյան երկաթուղի» ՓԲԸ-ի կողմից կատարված ֆինանսական ներդրումների ծավալը կազմել է շուրջ 90 մլրդ դրամ: Այսօր լրագրողների հետ հանդիպման ժամանակ այս մասին հայտնեց «Հարավկովկասյան երկաթուղի» ՓԲԸ-ի գլխավոր տնօրեն Վիկտոր Ռեբեցը:
«Այս տարի մենք հաջողությամբ ավարտեցինք դեռեւս 1898 թվականին կառուցված Զամանլուի երկաթուղային կամրջի վերակառուցումը, որի բացումը տեղի ունեցավ այս տարվա ապրիլին, եւ որի բացմանը
ներկա էր նախագահ Սերժ Սարգսյանը»,- ասաց ընկերության գլխավոր տնօրենը` ընդգծելով, որ Զամանլուի կամրջի վերակառուցման հետ մեկտեղ, եւս երկու երկաթուղային կամուրջներ են վերակառուցվել:
Կարդացեք նաև
Ըստ Վիկտոր Ռեբեցի` չորս տարվա ընթացքում ՀԿԵ-ի կողմից կատարված բեռնափոխադրումների ծավալը աճել է 18.4%-ով: Սակայն ընթացիկ տարում բեռնափոխադրումների ծավալը ավելի ցածր է եղել, քան անցած տարում:
«Երեք տարիների ընթացքում մեր ընկերության կողմից բեռնափոխադրումների սակագինը չի փոփոխվել: Անցնող տարում ուղեւորափոխադրումների ծավալի աճ եւս գրանցվել է: Ընթացիկ տարում կատարվել են որոշակի վերակառուցման աշխատանքներ, եւ արդյունքում որոշ հատվածներում հաջողվել է բարձրացնել գնացքների շարժման արագությունը` հասցնելով այն մինչեւ 100 կմ/ժ-ի»,-ասաց պարոն Ռեբեցը` հավելելով, որ վագոնների վերանորոգման շնորհիվ, նաեւ աճել է միջազգային ուղեւորափոխադրումների ծավալը:
Ասուլիսի ընթացքում Վիկտոր Ռեբեցը նաեւ անդրադարձավ Վանաձոր-Ֆիոլետովո 37.8 կմ երկարությամբ երկութաղային ճյուղի կառուցմանը` ասելով, որ դրա կառուցման համար կարող է պահանջվել 200-250 մլն դոլար:
Աշոտ ԱԹԱՅԱՆ
