Երեկ Aravot.am-ը տեղեկացրել էր, որ վերջին շրջանում տեղի են ունեցել ՀԱԿ-ից հեռացած լիբերալ ուժերի հավաքներ, որոնց ընթացքում խոսակցություններ են գնացել առաջիկա նախագահական ընտրություններում «Հանրապետություն» կուսակցության քաղխորհրդի նախկին անդամ Սուրեն Սուրենյանցի թեկնածության առաջադրման մասին:
Այսօր մեզ հետ զրույցում Սուրենյանցը հաստատեց, որ նման քննարկումներ եղել են. «Ոչ թե կուսակցությունների, այլ ավելի շատ անհատների մակարդակով քննարկվել է նման հարց: Բայց առաջադրվել-չառաջադրվելու խնդիրն ինքնանպատակ չէ: Միայն մի պարագայում արժե առաջադրվել, եթե, օրինակ, ես զգամ, որ այդ առաջադրումը կարող է նպաստել ազատական ուժերի կոնսոլիդացմանը կամ ազատական գաղափարների շրջանառությանը՝ նախընտրական քարոզարշավի ժամանակ»:
Սուրենյանցի կարծիքով, որեւէ մեկի առաջադրումն անիմաստ է, եթե վերոնշյալ երկու պայմաններից ոչ մեկը նպատակ չեն:
Կարդացեք նաև
«Ազատություն» կուսակցության նախագահ Հրանտ Բագրատյանի հայտարարությանը՝ առաջիկա նախագահական ընտրություններում առաջադրվելու վերաբերյալ, Սուրենյանցը շատ լավ է վերաբերվում. «Ազատական ուժերի վառ ներկայացուցիչներից մեկը Հրանտ Բագրատյանն է: Ցավոք, չեմ կանխատեսում, որ ՀԱԿ-ը ամբողջովին կաջակցի պարոն Բագրատյանին: Առայժմ, ուզում եմ հասկանալ, թե ի՞նչ ձեւաչափով է առաջադրվում. որպես «Ազատության» նախագա՞հ, ՀԱԿ-ի ներկայացուցի՞չ, թե՞ որպես անհատ, ով կարող է ավելի լայն կոնսոլիդացիա ապահովել իր առաջադրման շուրջ: Ամեն դեպքում, պարոն Բագրատյանը Հայաստանի ամենաազատական գործիչներից մեկն է եւ ես միայն ուրախ եմ նման գործչի առաջադրման համար»:
Հրանտ Բագրատյանը, ով այսօր ներկա էր «Հանրապետություն» կուսակցության համագումարին, իր հնարավոր առաջադրման շուրջ որեւէ հարցի չցանկացավ պատասխանել:
Նելլի ԳՐԻԳՈՐՅԱՆ
