«Հայաստանյան քաղաքական դաշտը բաժանվեց երկու մասի՝ կամ պետք է համաձայնվես ՀԱԿ-ի հետ եւ ԲՀԿ-ի հետ համագործակցությանը, կամ դու Սերժ Սարգսյանի կողմից ես: Ես մերժում եմ թե Սերժ Սարգսյանին, թե Ռոբերտ Քոչարյանին, թե ԲՀԿ-ին եւ նրանց հետ համագործակցելու խնդիր չունեմ: Թե ինչպես են դա իրենք որակում, դա արդեն իրենց խնդիրն է, եւ նաեւ հենց այդ որակումների համար իրենք խնդիրներ ունեն, ինչից ես չեմ ուրախանում կամ չարախնդում»,- մինչ կուսակցության համագումարի մեկնարկը, լրագրողների հետ զրույցում պատասխանելով հարցին՝ ինչպես է վերաբերվում հնչող այն մեղադրանքներին, որ «Հանրապետությունը» համագործակցում է իշխանության հետ, ասաց կուսակցության նախագահ Արամ Սարգսյանը։ Նա հավելեց, որ երբեք էլ չի թաքցրել, որ ինքը դեմ է եղել ԲՀԿ-ի հետ ՀԱԿ-ի համագործակցությանը. «Ես իմ դեմ լինելն արտահայտել եմ հրապարակում՝ հարթակի վրա, իմ դեմ լինելու մասին ասել է նաեւ ՀՀ առաջին նախագահ Լեւոն Տեր-Պետրոսյանը, ու ինձ գաղտնալսելու կարիքը չկա: Ես ընդհանրապես այն քաղաքական գործիչներից եմ, որ գաղտնիքներ չեմ պահում»: Անդրադառնալով երկու պատգամավորների՝ Լեւոն Զուրաբյանի եւ Վարդան Օսկանյանի հետ տեղի ունեցած միջադեպին՝ ասաց. «Գաղտնալսումներ անելն ու դրանք հրապարակելը ես համարում եմ ԿԳԲ-ական, շպիոնական մեթոդներ, ինչը բարոյական չէ: Ես անգամ չեմ սիրում, երբ իմ տղան խոսում է, ես կողքին կանգնած եմ. դա դաստիարակության խնդիր է»։
Նելլի ԳՐԻԳՈՐՅԱՆ
