Երեկ Երեւանի քաղաքապետ Տարոն Մարգարյանը վառեց գլխավոր տոնածառի լույսերը: Դրան հաջորդեց տոնական հրավառությունը: Ինչպես քաղաքապետն ասաց` այս մեկ միջոցառումով դրվեց ամանորյա մյուս միջոցառումների սկիզբը:
Հանրապետության հրապարակում տեղակայաված գլխավոր տոնածառի բարձրությունը 32 մետր է: Դրա զարդարման համար օգտագործվել են 6000 ճյուղեր և ավելի քան 50 հազար լուսադիոդային սարքեր: Ընդհանուր լուսադիոդային լարերի երկարությունն անցնում է 17 կմ-ից: Ձևավորման համար օգտագործվել են 700 թարթող լույսեր, 70 աստղեր:
Ամանորի տոներին Երեւանի տարբերանշանն է լինելու ոսկեգույն երանգներով հրեշտակը:
Հանրապետության հրապարակում երեկ անհնար էր չնկատել երեխաների, ովքեր ցանկանում էին նկարվել տոնածառի մոտ, ծնողները նույնպես ոչնչով չէին զիջում նրանց:
«Անցյալ տարի էլ, այս տարի էլ` տոնածառը գեղեցիկ է: Ամեն տարի մենք գալիս ենք արարողությանը ներկա գտնվելու համար»,- ասում է տիկին Շահանեն:
Նառան նույնպես հավանել էր տոնածառը, սակայն մեզ ասաց. «Լավ կլիներ լույսերի գույնը փոխված լիներ: Որքան հիշում եմ` անցյալ տարի էլ էր այս գույները»:
Վահեի խոսքով` երեկ այն օրն էր, որ արժեր լիաթոք ուրախանալ: Ըստ նրա, պետք է ամեն ինչ դնել մի կողմ եւ մի քիչ տոնական տրամադրություն ստանալ:
Արամ Արարատյան
