Այսօր ՀՀ մշակույթի նախարարությունում փոխնախարար Արթուր Պողոսյանը լրագրողներին ներկայացրեց ՀՀ կառավարության 2012 թ. նոյեմբերի 15-ի նիստում հավանության արժանացած մանուկների և պատանիների գեղարվեստական կրթության և գեղագիտական դաստիարակության 2013-2015 թվականների ծրագիրը:
Փոխնախարարի խոսքով. «Վերջին տարիներին մատաղ սերնդի ազգային, մշակութային դաստիարակության առումով որոշակի բացեր են ի հայտ եկել, որոնք մտահոգում են մշակույթի նախարարությանը եւ կառավարությանը, որը հանձնարարել էր շահագիգիռ նախարարությունների հետ այս տարի մշակել համապատասխան ծրագիր, որը մանուկների և պատանիների գեղարվեստական կրթության և գեղագիտական դաստիարակության գործում նաեւ նոր մեթոդներ կներդնի»:
Ներկայացնելով ծրագրի հիմնական ուղղությունները` Արթուր Պողոսյանը նշեց, որ աշխատանքներ կտարվեն հանրակրթական համակարգում ներառված պատանիների եւ մանուկների հետ` մանկապարտեզից մինչ ավագ դպրոց. «Քանի որ այդ համակարգի մանուկները եւ պատանիները մեր վաղվա քաղաքացիներն են, խնդիր է դրվում նրանց ազգային արժեքների հիման վրա եւ մշակույթին մոտ դաստիարակություն տալ` հենց մանկապարտեզից սկսած: Իհարկե, հանրակրթական համակարգում գոյություն ունի մշակութային բաղադրիչ, բայց մենք փորձել ենք այն հարստացնել կոնկրետ կրթական ծրագրերով եւ առաջարկներով: Օրինակ, մանկապարտեզներում գործում են խմբակներ, սակայն ուսումնասիրությունների արդյունքում եկել ենք եզրահանգման, որ դրանք իրականացվում են ոչ պրոֆեսիոնալ ձեւով, եւ անհրաժեշտ է գիտամեթոդական մոտեցում: Այդ պատճառով ԿԳ նախարարության հետ համագործակցելով` առաջարկում ենք ստեղծել գիտամեթոդական ձեռնարկներ»:
Փոխնախարարը նաեւ նշեց, որ ծրագրում ներառված է մշակութաբանություն, գեղագիտություն, ազգագրություն առարկաների ուսումնամեթոդական ձեռնարկների հրատարակումը, որը կիրականացվի ԿԳ նախարարության հետ:
Կարդացեք նաև
Պողոսյանը հայտնեց, որ հիմնական դպրոցներում կներդրվի Ազգային երգ եւ պար առարկան, իսկ ավագ դպրոցում` Համաշխարհային մշակույթի պատմություն առարկան. «Բացի այդ, մշակույթի նախարարությունը կտպագրի «Դպրոցականի գրադարան» խորագրով մատենաշարը, իսկ մինչ 2013թ-ի վերջը ծրագրվում է ստեղծել Մշակույթի ազգային ինստիտուտ: Ծրագրում ներառված են նաեւ բազմաբնույթ եւ բազմաթիվ մանկական միջոցառումներ»:
Լուիզա ՍՈՒՔԻԱՍՅԱՆ
