2010թ. սեպտեմբերի լույս 4-ի գիշերը Իջեւան քաղաքի Մետաղագործների-58 հասցեում թունավորել են Գանձաքարի նախկին գյուղապետ Անաստաս Հակոբյանի 2 գլուխ խոշոր եղջերավոր անասունները եւ 68 խոզերը` պատճառելով 5, 5 միլիոն դրամի վնաս: Ա. Հակոբյանը Իջեւանի հակակոռուպցիոն կենտրոնին տեղեկացրել է, որ դեպքի մասին ինքը նույն օրը հաղորդել է ոստիկանության Իջեւանի բաժին, սակայն այդ օրը նրա հաղորդագրությունը ոստիկանությունում չեն ընդունել եւ համապատասխան միջոցառումներ չեն ձեռնարկել: Հակոբյանը սեփական նախաձեռնությամբ նմուշներ է վերցրել անկված անասունների մսեղիքից, անասունների այդ օրվա կերից, խմելու ջրից եւ ստուգման տարել հանրապետական անասնաբուժական համաճարակային եւ ախտորոշիչ կենտրոն: 2010թ. սեպտեմբերի 6-ին այդ ստուգման արդյունքները ստանալով` նա ներկայացրել է ոստիկանության Իջեւանի բաժին, որից հետո ոստիկանությունում այդ նյութերը գրանցել են: Չանցած մեկ ամիս, փոխվել է գործով քննիչը եւ քրեական գործի վարույթը կասեցվել է: Մեկ տարի ութ ամիս անց Ա. Հակոբյանն ինքնուրույն ձեռնարկել է գործի բացահայտման միջոցառումներ: Նա գրավոր դիմել է Իջեւանի ոստիկանության բաժին եւ Տավուշի քննչական բաժին`նշելով այն վկայի անունը, որի միջոցով կարող է գործը բացահայտվել,սակայն վկան չի հրավիրվել եւ չի հարցաքննվել: 2012թ. հունվարի 12-ին Իջեւան քաղաքի երկու բնակիչներ գրավոր հայտարարություն են ներկայացրել Անաստաս Հակոբյանին, որ լուրեր ունեն այն մասին, թե նրա անասունները ում միջոցով են թունավորվել: Մայիսի 13-ին Հակոբյանը դիմել է Տավուշի մարզի դատախազին եւ մայիսի 21-ին դատախազից պատասխան է ստացել, որ իր դիմումի պատասխանը կստանա ոստիկանության Տավուշի քննչական բաժնից: Ա. Հակոբյանը դիմել է Իջեւանի հակակոռուպցիոն կենտրոն: Կենտրոնն այդ դիմումն ուղարկել ՀՀ Գլխավոր դատախազին, վերջինս էլ գրությունը հասցեագրել է Տավուշի մարզի դատախազություն: 2012թ. օգոստոսի 8-ին Տավուշի մարզի դատախազի տեղակալ, արդարադատության առաջին դասի խորհրդական Աշոտ Գեւորգյանը գրություն է ուղարկել Տավուշի մարզի քննչական բաժնի պետ Կ. Հակոբյանին, հայտնելով, որ քննչական բաժին է ուղարկվում Անաստաս Հակոբյանի դիմումը՝ այն իրենց վարույթում գտնվող քրեական գործին կցելու եւ համատեղ ընթացք տալու համար: Դատախազ Ա. Գեւորգյանը քննչական բաժնի պետին հայտնել է, որ անհրաժեշտ է ստուգել Ա. Հակոբյանի դիմումի մեջ նշված փաստերը, կատարել անհրաժեշտ քննչական գործողություններ եւ արդյունքների մասին հայտնել դիմումատուին եւ մարզի դատախազությանը: Անաստաս Հակոբյանն ասաց, որ ներկայումս քրեական գործը նոր, երիտասարդ քննիչի են տվել՝ Գասպարյան ազգանունով: Հակոբյանի խոսքերով՝ բազմաչարչար գործով նա արդեն երրորդ քննիչն է: Հակոբյանն ասում է , որ ինքը Տավուշի քննչական բաժնում ցուցմունք է տվել, հայտնել գործի բացահայտման համար կարեւոր անուններ, փաստեր,նշել կարեւոր 3-4 վկաների անուններ, սակայն ոստիկանությունը ըստ էության չի զբաղվում գործի քննությամբ:
Ոսկան ՍԱՐԳՍՅԱՆ
