Ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Արսեն Մարգարյանի կողմից նյութեր են նախապատրաստվում երեկ՝ դեկտեմբերի 19-ին, Երևանում տեղի ունեցած ավտովթարի փաստով:
Ինչպես ավելի վաղ հայտնել էր ֆոտոլրագրող Գագիկ Շամշյանը, ժամը 23:00-ի սահմաններում, Արցախի փողոցի բնակիչ, 33-ամյա Տիգրան Քութաիսյանը, «Grand Cherokee» մակնիշի 16 ՕՕ 801 համարանիշի ավտոմեքենայով բախվել էր Հանրապետության փողոցի թիվ 58 շենքի դիմաց կայանված Դավիթաշեն 3-րդ թաղամասի բնակիչ, 34-ամյա Արթուր Հովհաննիսյանի վարած «Hyundai» մակնիշի 14 ՍՏ 509 համարանիշի ավտոմեքենային:
Վթարի հետևանքով «Grand Cherokee»-ի ուղևոր 29-ամյա Արևիկ Ներսիսյանը մարմնական վնասվածքներով տեղափոխվել էր Թիվ 1 համալսարանական հիվանդանոց:
Ֆոտոլրագրողը հայտնել էր նաև, որ Տ. Քութաիսյանը քննիչի հանձնարարականով տեղափոխվել էր հիվանդանոց՝ փորձաքննության, պարզելու սթափության աստիճանը: Փորձաքննության արդյունքներով հայտնի է դարձել, որ Տ. Քութաիսյանը ավտոմեքենան վարել է ոչ սթափ վիճակում:
Գ. Շամշյանը հայտնել էր, որ Տ. Քութաիսյանը աշխատում է ՀՀ Արտաքին գործերի նախարարությունում՝ որպես գլխավոր մասնագետ, իսկ Ա. Հովհաննիսյանը՝ ՀՀ ոստիկանության կազմակերպված հանցավորության դեմ պայքարի գլխավոր վարչության 1-ին վարչության 2-րդ բաժնի պետի պետի տեղակալ:
