Այսօր «Հայելի» ակումբում Մշակույթի նախարարության Ժամանակակից արվեստի վարչության պետ Սեյրանուհի Գեղամյանը եւ արվեստի քննադատ Լիլիթ Սարգսյանը խոսեցին Վենետիկի 55-րդ միջազգային բիենալեի հայկական տաղավարի կազմակերպման խափանումից: Լիլիթ Սարգսյանը տեղեկացրեց, որ շուրջ հարյուր տարվա պատմություն ունեցող Վենետիկի միջազգային բիենալեն ժամանակակից արվեստի ամենանշանավոր, կայացած ֆորումն է աշխարհում եւ անցկացվում է երկու տարին մեկ. «Մեզ հետաքրքրում է Հայաստանի տաղավարի տեղը, դերը եւ նշանակությունը, քանի որ յուրաքանչյուր տաղավար ներկայանում է իր երկրի դրոշի ներքո, այսինքն` վերածվում է ազգային տաղավարի, արտացոլում է պետության մշակութային քաղաքականությունը եւ ներկայացնում է պետության վերաբերմունքը ժամանակակից արվեստի հանդեպ: Երբ երկիրը բիենալեի կազմկոմիտեից ստանում է հրավեր-նամակ, նշանակում է կոմիսար, ով ապահովում է տաղավարի բացման համար նախատեսված դրամահավաքը եւ նշանակում է համադրողի, ով իր հերթին զբաղվում է արվեստի վերաբերյալ հարցերով: Նա ընտրում է արվեստագետներին, եւ մշակվում է բիենալեին ներկայացվելիք նախագիծը»:
Լիլիթ Սարգսյանին խոսքով. «2010թ-ին բիենալեին մասնակցության կազմակերպման ընթացքը բեկումնային էր, քանի որ ՆՓԱԿ-ից հետ կազմակերպչական աշխատանքները ստանձնեց Մշակույթի նախարարությունը: Նոյեմբերի 21-ին նախարարության կայքում տեղադրվեց հայտարարություն, համաձայն որի` ընդունվում են հայտեր` ֆորումին Հայաստանի մասնակցության հայեցակարգի եւ հայկական տաղավարի բովանդակային ձեւավորման առաջարկությամբ: Հայտարարության մեջ նշվում է, որ առաջարկների ընդունման վերջնաժամկետն է դեկտեմբերի 15-ը, իսկ հաղթող առաջարկի հեղինակը կընդգրկվի Վենետիկ մեկնող պատվիրակության կազմում: Զանգահարեցի նախարարություն եւ փորձեցի պարզել նախագծի վերաբերյալ մանրամասներ, սակայն ասացին, որ ոչինչ չգիտեն, անգամ` կոմիսար եւ համադրող չի նշանակվել: Նախկինում, երբ կազմակերպչական գործառույթը ՆՓԱԿ-ին էր, նման խնդիրներ չէին առաջանում: Բացի այդ, նախարարությունը հայտարարություն է տարածել բիենալեի հայտարարությունից երեք ամիս հետո, այսինքն` արվեստագետներն ունեին պատրաստվելու ընդամենը 26 օր ժամանակ»:
Իսկ Սեյրանուհի Գեղամյանի պնդմամբ «Նախարարությունը մինչ այդ համապատասխան քայլեր չի ձեռնարկել, քանզի որպես պաշտոնական կառույց` բիենալեից չի ստացել պաշտոնական նամակ-հրավեր` չնայած այն հանգամանքին, որ 2013թ-ի բյուջեում ամրագրել է կազմակերպմանն աջակցելու մասին: Իսկ նախորդ անգամ մենք ստացել էինք հրավեր: Նախարարությունը ոչ թե միջոցառումը կազմակերպողն է, այլ կազմակերպմանն աջակցողը: Խնդիրն այն է, որ ոչ մեկ նախագծի առաջարկով հայտ չի ներկայացրել մեզ: Եթե հայտ ներկայացվեր, ձախողում չէր լինի»:
Կարդացեք նաև
Ասուլիսին ներկա արվեստագետները պնդում էին, որ ցանկացել են հայտ ներկայացնել եւ հետաքրքրվել են մանրամասներով, սակայն նախարարությունից պատասխանել են, որ իրենք էլ չգիտեն դրանց մասին, քանի որ հրավեր չեն ստացել:
Լուիզա ՍՈՒՔԻԱՍՅԱՆ
