ՀԱԿ անդամ Սոս Գիմիշյանի համար Հրանտ Բագրատյանի հնարավոր առաջադրման մասին այսօրվա հայտարարությունն անսպասելի էր:
«Այն, որ ՀՀՇ համագումարից մի քանի օր առաջ է այս հայտարարությունն արվել, ինձ համար դժվար է բացատրել, անհասկանալի է, մի քիչ անսպասելի: Բայց Հրանտ Բագրատյան թեկնածու խոսակցություններ եղել են, խնդիր չեմ տեսնում նրա հայտարարության մեջ»,- ասաց պարոն Գիմիշյանը:
Նա պարոն Բագրատյանի առաջադրվելու մասին հայտարարությունը չի պայմանավորում ոչ Զուրաբյան-Օսկանյան զրույցով, ոչ ՀԱԿ-ի ներսում սկսված տարաձայնություններով , ոչ էլ ինչ-որ մեկին ուղղված հատուկ ուղերձով եւ չի բացառում, որ այն պայմանավորված է ՀԱԿ առաջնորդ Լեւոն Տեր-Պետրոսյանի չառաջադրվելու հնարավոր որոշման հետ.
«Կարող եք կապել դրա հետ կամ չկապել: Չեմ բացառում»:
Կարդացեք նաև
Մեր հարցին, թե պարոն Բագրատյանը մրցակցային թեկնածու կլինի՞, պարոն Գիմիշյանն ասաց՝ դժվար եմ պատկերացնում. «Դժվար է ասել, որ այդպիսին լինի: Ամենամրցակցային թեկնածուն Լեւոն Պետրոսյանն է, բայց եթե նա չի առաջադրվում, շատ հանգիստ ու նորմալ եմ վերաբերվում: ՀՀՇ համագումարին կերեւա, առաջադրվո՞ւմ է, թե՞ ոչ, դրանից հետո գնահատականներ կտանք»:
Պարոն Գիմիշյանը նաեւ չբացառեց Հրանտ Բագրատյանին սատարելու հնարավորությունը, այն դեպքում, եթե ՀԱԿ-ից այլ թեկնածու չառաջադրվի:
Մեր հարցին, թե ՀԱԿ առաջնորդը կողջունի՞ Բագրատյանի առաջադրվելու մասին որոշումը, պարոն Գիմիշյանն ասաց. «Չեմ կարծում, թե ինքը խնդիր տեսնի, առավել եւս՝ եթե ինքը չի առաջադրվում»:
Հիշեցնենք, որ այսօր ՀԱԿ պատգամավոր Հրանտ Բագրատյանը facebook-ի իր էջում հայտարարել էր, որ «Ազատություն» կուսակցության գալիք համագումարի օրակարգում իրեն որպես ՀՀ նախագահի թեկնածու առաջադրվելու հարցն է։ Նա նաեւ տեղեկացրել էր, որ Լևոն Տեր-Պետրոսյանի առաջադրվելու դեպքում ինքը կհանի իր թեկնածությունը (եթե առաջադրված լինի), իսկ այս ընթացքում դադարեցնում է ակտիվ համագործակցությունը ՀԱԿ քաղաքական խորհրդի հետ՝ նրանցից որևիցե մեկին կաշկանդած չլինելու համար:
Արփինե ՍԻՄՈՆՅԱՆ
