ԱՄՆ-ում գործող Policy Forum Armenia (PFA) միջազգային հետազոտական կազմակերպության ներկայացրած «Հայաստանի 2012 թվականի խորհրդարանական ընտրությունները» զեկույցի եզահանգումներ և առաջարկություններ բաժնում նշված է. «Ընտրությունների մասնակցության ուռճացման հանգեցնող ընտրակեղծիքի հիմնական շահառուն Հայաստանի հանրապետական կուսակցությունն է»:
Արդյոք ՀՀԿ-ում ընդունո՞ւմ են միջազգային կազմակերպության կատարած ուսումնասիրությունների այս ելքը, Aravot.am-ը փորձեց պարզել ՀՀԿ խմբակցության պատգամավոր, ԱԺ Գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանի հետ զրույցում: Պատգամավորը, ինչպես ինքն ասաց, բնականաբար չի կիսում այդ կարծիքը և մանրամասնեց. «Ինչո՞ւ են ցուցակներըը տարեցտարի, ընտրությունից ընտրություն աճում…այդ ամեն ինչի բացատրությունը և ԿԸՀ նախագահը, և այն մարդիկ, ովքեր իրավասու են պատասխանել, պատասխանել են: Իսկ այն, որ դրա շահառուն Հանրապետական կուսակցությունն է, որ ուժին կամ մարդուն է դա ձեռք տալիս, այս ամեն ինչը կարծում եմ, որ անշնորհակալ, պարապ զբաղմունք է: Բնական է, եթե կան մարդիկ, և այդ մարդկանց տարիքը կոնկրետ այդ ժամանակահատվածում հասնում է և ընտրելու իրավունք ունեն, պիտի ցուցակներում ընդգրկված լինեն»:
Ի պատասխան մեր այն հստակեցմանը, թե զեկույցում ամրագրված դրույթը այդ դեպքում անհի՞մն է, պարոն Դավթյանն այսպես պատասխանեց. «Աշխարհում ցանկացած բան կարող են կապել ընդհանրապես կապ չունեցող մեկ այլ երևույթի հետ, քանի որ ամեն ինչ փոխկապակցված է: Ես ուղղակի չէի ցանկանա միանգամից պիտակներ տալ, ի վերջո նրանք են զեկույցը կազմում, ու բնական է, որ ունեն սեփական շահերը: Եվ այն, ինչ անում են, հիմքում դնում են սեփական շահը: Այս առումով պիտի հասկանալ, թե ինչու են այդ բանը անում: Իսկ դա անելու համար պիտի հասկանանք, թե ի վերջո ո՞ւմ է ձեռնտու կամ իրենք ո՞ւմ շահառուն են»:
Կարդացեք նաև
Տաթև ՀԱՐՈՒԹՅՈՒՆՅԱՆ
