«Հարսնաքար» ռեստորանային համալիրում այս տարվա հունիսի 17-ին տեղի ունեցած բռնությունների եւ բռնությունների զոհ դարձած ռազմական բժիշկ Վահե Ավետյանի գործով երեկ Ավան եւ Նոր Նորք վաչական շրջանների ընդհանուր իրավասության դատարան էր ներկայացել «Դավիթ ԴՎՍ» ՍՊԸ տնօրեն («Հարսնաքարի» սեփականատերը) Հրաչյա Զոհրաբյանը:
Նրա ցուցմունքին հետեւեց, մասնավորապես, տուժողի ներկայացուցիչ Տիգրան Եգորյանի հարցաքննությունը, որն արժանացավ կոշտ դիմադրության եւ «կանխարգելիչ» ռեպլիկների ամբաստանյալների պաշտպանների, ինչու ոչ, նաեւ դահլիճում ներկա ամբաստանյալների հարազատների կողմից:
Դատարան ներկայացած անդրանիկ վկան հայտնել էր, որ դեպքի օրը՝ հունիսի 17-ին (ի դեպ, կիրակի), ռեստորանային համալիրի 2-րդ հարկում հարսանիք է եղել: Բնական էր, որ մեղադրական կողմն իր մարտավարությունը կառուցեր հենց այդ իրադարձության հավաստիության շուրջ:
Կարդացեք նաև
Երբ Տ.Եգորյանը փորձեց իմանալ, թե վկան, որը աշխատանքի բերումով համակարգում է կազմակերպչական հարցերը, թե մեծ միջոցառումների՝ հարսանիքների ժամանակ ինչպես են դիմողների տվյալները լրացվում, ինչպես է կազմվում մասնակիցների ցանկը՝ գրավո՞ր, լուսանկարվո՞ւմ է, ո՞ւմ առաջարկով՝ ռեստորանի՞, ամբաստանյալ Գարիկ Մարգայանի պաշտպան, հանրային գրասենյակի փաստաբան Մարինե Թովմասյանը վրդովվեց, տեղից բղավելով. «Ինչ կապ ունի , հարսանիքը մեծ միջոցառո՞ւմ է, թե՞ ոչ, հարսի քողը երկա՞ր է, թե՞ կարճ»:
Իսկ ամբաստանյալ Նորայր Հայրապետյանի պաշտպան, փաստաբան Երեմ Սարգսյանն էլ հարցերի դեմ առարկելով, ակնարկեց, թե մեղադրական կողմը փորձում է այլ մարդկանց ներգրավել:
Տիգրան Եգորյանի հարցաքննությունը չի ավարտվել, եւ այն կշարունակվի դեկտեմբերի 21-ին:
Ռուզան ՄԻՆԱՍՅԱՆ
