Ամանորին հաշված օրեր են մնացել, եւ շատերի մոտ հարց է առաջանում` ի՞նչ պատրաստել ամանորյա սեղանի համար, ի՞նչ քանակով, ինչքա՞ն փողով:
Կուրորտաբանության եւ ֆիզիկական բժշկության գիտահետազոտական կենտրոնի բժիշկ-դիետոլոգ Վարդանուշ Պետրոսյանի կարծիքով` ամանօրյա ճոխ սեղանները դեռեւս անհասանելի են մեր ազգաբնակչության մի ստվար զանգվածի համար, իսկ նրանք, ովքեր, այնուամենայնիվ,կարող են իրենց այդ ամանօրյա ճոխությունը թույլ տալ, պետք է ավելի զուսպ լինեն ու զգույշ՝ սննդային թունավորումներից խուսափելու համար:
Բժշկի խոսքով` ամանօրյա երկու շաբաթվա ընթացքում հնարավոր չէ ճարպակալել:
«Ճարպակալումն ընդհանրապես լուրջ հիվանդություն է, որը կապված է սխալ ապրելակերպի հետ, եւ 14 օրում հնարավոր չէ այդ հիվանդությունը ձեռք բերել: Հա, հնարավոր ա 14 օրում ուտեք ու քիչ շարժվեք, մի երկու կիլո էլ չաղանաք, բայց հետո շարժվելուց էդ ավելացած կիլոները հեշտությամբ կանհետանան»,- նկատեց դիետոլոգը` ընգծելով, որ տոնական օրերին հատկապես պետք է ուշադրություն դարձնել սննդի անվտանգությանն ու թարմությանը:
Կարդացեք նաև
Հայկական հոգեբուժական ասոցիացիայի նախագահ Արմեն Սողոյանը պնդմամբ` Ամանորի նախօրեին պետք է խուսափել առեւտրամոլությունից ու շատակերությունից:
«Փորձը ցույց է տալիս, որ քիչ փող ունեցողն ավելի շատ առեւտուր է անում, քան հարուստը: Այս երևույթը բացատրվում է հոգեբանական տեսանկյունից: Քիչ փող ունեցողը ամբողջ տարին իրեն զսպում է եւ չի կարողանում իր բոլոր պահանջները բավարարել, իսկ տոներից առաջ այլեւս իրեն զսպել չի կարողանում»,- պարզաբանեց հոգեբույժը` նշելով, որ տոներից հետո էլ մարդկանց մոտ առաջանում են դեպրեսիաներ, որոնք կապված են թե ծախսերի եւ թե նոր տարվա տոների չիրականացված ակնկալիքների հետ:
Բժիշկ-դիետոլոգը տոնական օրերին ջերմությամբ ուղեկցվող մարսողական խանգարումների դեպքում խորհուրդ տվեց այնպայման դիմել բժշկի` նկատելով, որ այդ օրերին բժիշկ գտնելը բարդ գործ է:
Իսկ հոգեբուժական ասոցիացիայի նախագահը բոլորին կոչ արեց գալիք տարվան ավելի լավատեսորեն նայել եւ շատ չտանջվել դրան նախապատրաստվելիս:
Աշոտ ԱԹԱՅԱՆ
