«Սա նո՛ր Հայաստան է և վերջ:
Սա խոսքի ազատության, ժողովրդավարության Հայաստան է և վերջ:
Սա օրենքի գերակայության և իրավունքի Հայաստան է և վերջ… »,- նախագահի ելույթից 4 օր անց ԱԺ ՀՀԿ-ական պատգամավոր Մհեր Սեդրակյանը սպառնում է պոկել «Ա1+»-ի լրագրող Մհեր Արշակյանի ծնոտը՝ «Դավա՜յ, դավա՜յ, յալլա՜, կտամ ծնոտդ կպոկեմ»:
Իրավապաշտպան Վարդան Հարությունյանի տպավորությամբ. «Հայաստանի մասին խոսելիս նախագահը խոսում էր Նորվեգիայի, Կանադայի մասին, որտեղ չկան օրինազանցությունները, այսօրվա մեր օլիգարխները, պատգամավորները , որտեղ չկա ամենաթողության այն միջավայրը, որը ստեղծել է հենց ինքը՝ հանրապետության նախագահը»:
Ըստ պարոն Հարությունյանի, հանրապետական պատգամավորի այսօրվա պահվածքը հակասում է ՀՀ նախագահի պնդումներին. «Այդ դեպքը նրա ելույթի հետ մեր իրականության հակասության մասին է խոսում: Նախագահը հասարակության միջից ընտրել է, պեղել է հենց այդ մակարդակի մարդկանց ու նրանցով է ներկայանում աշխարհին: Հանրապետական կուսակցությունում ամենաթողության դրսեւորումներ են, բայց չեմ ցանկանում նրանց կուսակցական զգեստ հագցնել, նրանք կուսակցությունից, հանրապետականից էլ են դուրս: Նրանք այդպիսին են, երեւույթ են, պարզապես այսօր հանրապետական կուսակցության դրոշի տակ են հանդես գալիս: Ամենաթողության դեմ պայքարը նախագահը պետք է սկսի իր շրջապատից: Տեսնում ենք ե՛ւ նրա ընտանիքի անդամներին, ե՛ւ նրա կուսակիցներին»:
Կարդացեք նաև
Արփինե ՍԻՄՈՆՅԱՆ
