Այսօր ԱԺ նիստում ընդունվեցին մի շարք օրինագծեր: Կառավարության կողմից ներկայացված հարկային եւ պարտադիր ապահովության մասին օրենքում փոփոխություններ կատարելու հարցն ընդունվեց 64 կողմ, 7 դեմ, 21 ձեռնպահ քվեարկությամբ: Դրամարկղային գործառույթների մասին օրենքում փոփոխություններ կատարելու հարցը նույնպես ամբողջությամբ ընդունվեց՝ 64 կողմ, 5 դեմ, 25 ձեռնպահով: Ընդունվեց նաեւ Լիցենզավորման օրենքում փոփոխություններ կատարելու մասին եւ Վարչական իրավախախտումների մասին օրենսգրքում փոփոխություններ կատարելու օրինագծերը: Հաստատվեց նաեւ 2013-2015-ի պետական վիճակագրական ծառայության եռամյա ծրագիրը:
Ինչ վերաբերում է հայտնի հարցի՝ Էթիկայի հանձնաժողովի կազմավորման քվեարկությանը, մինչ քվեարկությունը ՀԱԿ պատգամավոր Նիկոլ Փաշինյանը հայտարարեց, որ ընդունում է Դավիթ Հարությունյանի բանավեճի հրավերը:
ՀՅԴ խմբակցության ղեկավար Արմեն Ռուստամյանն էլ ասաց, որ օրինագիծը փոփոխության է ենթարկվել, այդ իսկ պատճառով կմասնակցեն իրենք հանձնաժողովի նիստերին: Ըստ պարոն Ռուստամյանի, հանվել է այն հատվածը, որից ենթադրվում էր, որ անգործունակ է դառնալու այդ հանձնաժողովը: Բայց, այնուամենայնիվ, նա հայտարարեց, որ իրենք օրինագծին ձեռնպահ են քվեարկելու:
Կարդացեք նաև
Իսկ ԲՀԿ խմբակցության քարտուղար Նաիրա Զոհրաբյանն էլ հայտարարեց, որ իրենք էլ կշարունակեն մասնակցել հանձնաժողովի աշխատանքներին, եթե , իհարկե, Դավիթ Հարությունյանի գալուց հետո նոր բաներ չփոխվի, որովհետեւ «մեծերի գործերն անկանխատեսելի են»:
Վահան Հովհաննիսյանն էլ զգուշացրեց, որ հետեւում են քվեարկությանը եւ հանկարծ այնպես չստացվի, որ օրենքն անցկացնեք, ներկա էին 63 պատգամավոր: «Պարոն Հովհաննիսյան, դուք դավեր եք նյութում»,- արձագանքեց ԱԺ նախագահ Հովիկ Աբրահամյանը:
ՀՀԿ պատգամավոր Արփինե Հովհաննիսյանն էլ տեղեկացրեց, որ վերջնական տարբերակում ընդունվել է «3+3+1» ձեւաչափը, գումարած ԲՀԿ-ն: Հանվել է վետոյի իրավունքը, որը ընդդիմության ներկայացուցիչների համար թիրախային էր՝ քննադատության համար:
Նաիրա Զոհրաբյանը փոխեց որոշումը՝ ասելով, որ իրենք չեն մասնակցելու քվեարկությանը:
Քվեարկությունը չկայացավ առայժմ, ՀՀԿ խմբակցության ղեկավարի խնդրանքով հայտարարվեց 20 րոպե ընդմիջում:
Հռիփսիմե ՋԵԲԵՋՅԱՆ
