«Ցավոք, մեզ նման երկրներում արտաքին ուժերի ազդեցությունը բացառել հնարավոր չէ»,- «Հայոց Աշխարհ»-ի հետ զրույցում ասաց ՀՅԴ խորհրդարանական խմբակցության քարտուղար ԱՂՎԱՆ ՎԱՐԴԱՆՅԱՆԸ՝ միաժամանակ հավելելով. «Բայց մենք պետք է այնքան խելք ունենանք, որ, գիտակցելով մեր պետության ու քաղաքացիների շահերը, ամեն կերպ բացառենք, թույլ չտանք արտաքին ուժերի միջամտությունը մեր գործերին` մեր հարցերն ինքներս լուծելով»:
Փոխարենը ԱԺ նախագահ ՀՈՎԻԿ ԱԲՐԱՀԱՄՅԱՆԻՆ առանձնապես չի անհանգստացնում այդ երեւույթը. «Չեմ կարծում, որ կա նման մեծ ազդեցություն»։ Արտաքին ուժերի ներգործության մասին ասվածն ընդամենը խոսակցություններ համարելով՝ նա հիշեցնում է. «Մի մոռացեք, որ Հայաստանի քաղաքացիներն են ընտրում երկրի իշխանություններին, եւ որեւէ գործոն մեր քաղաքացիների կամքի վրա չի կարող ներազդել»:
Մինչդեռ տարածաշրջանում մրցակից ու թշնամի պետությունների առկայությունից անհանգստացած Հանրապետական կուսակցության փոխնախագահ, պատգամավոր ՌԱԶՄԻԿ ԶՈՀՐԱԲՅԱՆՆ ասաց, որ կան ուժեր, որոնց նպատակն է վտանգել հայոց պետականությունը, եւ այդ մտահոգությամբ հայ հասարակությանն ու քաղաքական ուժերին զգոնության կոչ արեց. «Մենք մեկ ազգ ենք, միասնական պետություն, նկատի ունեցեք` մեծ են մեզ շրջապատող վտանգները, զգուշացե՛ք»:
ԱԺ փոխնախագահ ՀԵՐՄԻՆԵ ՆԱՂԴԱԼՅԱՆԸ եւս անհրաժեշտ համարեց մեր ժողովրդին հիշեցնել, որ ինքն է իր ճակատագրի տերը. «Հարյուրամյակներ շարունակ մեր ժողովուրդը, չունենալով պետականություն, տիզբոններից, մոսկվաներից կամ էլ վաշինգտոններից էր ակնկալում իր ուժն ու հզորությունը, բայց այսօր չմոռանանք, որ անկախ պետականություն ունենք»:
Նաղդալյանը համոզված է նաեւ, որ եթե անգամ կան ուժեր, որոնք ինչ-ինչ հաշվարկներ ունեն, վաղ թե ուշ գիտակցելու են, որ մեր երկրում իրենց սցենարները հեռանկար չեն կարող ունենալ, իսկ ներսիններն էլ, ըստ նրա, դրսի թույլտվությամբ չէ, որ կարող են հայ ընտրողի աջակցությունը վայելել, քանզի` «բանալին միայն այստեղ է` Հայաստանում»:
Կարդացեք նաև
Արմինե ՍԻՄՈՆՅԱՆ
«Հայոց աշխարհ»
