Անտեսելով ցուրտն ու ձյունը` ճանապարհորդը իր չորքոտանի հավատարիմ բարեկամի հետ Հայաստանից Յակուտիա ճամփորդություն է կատարում: Գրում է «Յարոսլավսկի ռեգիոն» թերթը` անդրադառնալով հայ հեծանվաճանապարհորդ Արթուր Օհանյանին, որը հասել է Յարոսլավլ:
Յարոսլավլում Օհանյանը պատմել է իր ճանապարհորդության մասին: «Սա իմ երկրորդ մեծ ճանապարհորդությունն է: Մինչ այս ես հեծանիվով Յակուտիայից Երևան եմ հասել: Ճանապարհի վրա ծախսել էի 6 ամիս, 20 օր, այդ ընթացքում ես անցել եմ 13 հազար կմ: Այս անգամ որոշել եմ նորից նույն ուղիով գնալ, սակայն հիմա ուզում եմ ավելի շատ շրջաններ այցելել Ռուսաստանում», – պատմում է 35-ամյա հեծանվորդը:
Արթուր Օհանյանը ճանապարհորդությունը սկսել է սեպտեմբերի 10-ից ու արդեն ահագին ճանապարհ է անցել: Արթուրին ամենաշատը գրավում է ճանապարհը, տեսարժան վայրերը նրան չեն հետաքրքրում, սակայն ուրախացնում են անկեղծ, բարի մարդիկ, որոնք պատրաստ են ընդունել ճանապարհորդին, օգնել նրան դժվար պահերին, այդ պատճառով Արթուրին չի անհանգստացնում կացարան կամ ուտելիք գտնելը:
Նրա ճանապարհորդությունը ոչ ոք չի հովանավորում: Հեծանիվի վրա պարզապես փակցրած են Հայաստանի և Ռուսաստանի դրոշները, ոչ մի գովազդ կամ քաղաքական նշան չկա:
Կարդացեք նաև
Նրա շունը` Գրաֆը, ուղեկցում է տիրոջը և հսկում հեծանիվը: «Մենք հսկում ենք միմյանց», – ասում է նա` ժպտալով, – «Ես` նրան, ինքը` ինձ»:
Արթուր Օհանյանին դեռ երկար ճանապարհ է սպասվում, իսկ սառնամանիքը, ձյունն ու վատ եղանակը նրա համար պարզապես ժամանակավոր դժվարություններ են:
Պատրաստեց Հովհաննես ԻՇԽԱՆՅԱՆԸ
