Լուսանկարը` Panarmenian.net-ի
«Մենք սկսել ենք քայլ առ քայլ դեպի լուսանցք տեղափոխել երկրում տասնամյակներ շարունակ արմատներ ձգած կոռուպցիան ու չարաշահումները»,- ՀՀԿ վերջին համագումարում, նախօրեին վստահեցրեց ՀՀ նախագահ Սերժ Սարգսյանը:
Այսօր Aravot.am-ը ԵՄ խորհրդատվական խմբի պետական կառավարման բարեփոխումների հարցերով խորհրդատու Կառլ Ուլբրիխտից հետաքրքրվեց, արդյոք կառավարության հակակոռուպցիոն ծրագիրը արդյունավե՞տ էր, եւ կոռուպցիան Հայաստանում իսկապե՞ս լուսանցքում է հայտնվել:
Ըստ նրա, այդ հարցի շուրջ այս տարվա նոյեմբերի 3-ին քննարկում-հանդիպում են ունեցել մի խումբ պաշտոնյաների հետ ու հայտարարել, որ ծրագիրն անարդյունավետ էր. «Միջոցառումներ եղել են, բայց արդյունքներ չենք տեսել: Բայց այդ նիստի ժամանակ քննարկվել է նաեւ, թե հայկական կողմն ինչ քայլեր կարող է անել , ոնց ճիշտ կլինի ապագայում՝ նորից մշակենք հակակոռուպցիոն ընդհանուր ռազմավարությո՞ւն, թե՞ առանձին ռազմավարություններ առանձին ոլորտների համար: Եվ այդ քննարկումները պետք է շարունակենք: Միգուցե ըստ ոլորտների մշակենք բարեփոխումներ, որոնց մեջ կլինեն նաեւ հակակոռուպցիոն էլեմենտներ»:
Պարոն Ուլբրիխտից հետաքրքրվեցինք, ի՞նչն էր ծրագրի անարդյունավետության պատճառը. «Կարծում եմ՝ որոշ դեպքերում ճիշտ չի հասկացվել կոռուպցիայի պատճառը, դրա համար էլ, երբ մշակվել են միջոցառումներ, դրանք չեն կարողացել կանխել այդ երեւույթը»:
Մեր հարցին, թե ինչքա՞ն գումար է ծախսել կառավարությունը հակակոռուպցիոն ծրագրի համար, պարոն Ուլբրիխտն ասաց՝ չգիտի :
Արփինե ՍԻՄՈՆՅԱՆ
