Enjoy movies եւ AP cinema կինոընկերությունների համատեղ արտադրությամբ ստեղծված «Շնորհավոր ամանոր, մայրեր» լիրիկական կոմեդիայում, որի շնորհանդեսը կայացավ այսօր, նկարահանվել է նաեւ աշխարհահռչակ կինոդերասան Ալեն Դելոնը: Ընդ որում՝ Դելոնը ֆիլմում խաղում է հենց Դելոնին: «Շնորհավոր ամանոր, մայրերը» յուրօրինակ կինոձոն է բոլոր մայրերին:
Aravot.am-ը կինոաստղին հարցրեց՝ եթե հրաշքով մայրը ողջ լիներ, ի՞նչ նվեր կաներ նրան:
«16 տարի առաջ մայրս հեռացավ կյանքից: Չկա մի օր, որ չմտածեմ նրա մասին: Եթե նա ողջ լիներ, ոչ թե կոնկրետ նվեր կանեի, այլ անսահման սեր կնվիրեի ու վայրկյան անգամ չէի հեռանա կողքից»,-պատասխանեց սիրված կինոդերասանը:
Կարդացեք նաև
Քիչ անց հուզված հավելեց. «Կուզե՞ք իմանալ՝ ինչ է մայրս ինձ նվիրել, որը միշտ ինձ հետ է, ահա այս խաչը»: Երբ նա ծոցագրպանից հանեց խաչը, ասուլիսի բոլոր մասնակիցները ծափահարեցին:
«Մայրս այսօր 101 տարեկան կլիներ: Ինչի որ հասել եմ կյանքիս ընթացքում, նրան եմ պարտական: Մայրս հոգով ռոմանտիկ դերասանուհի էր, ինքը երազում էր դառնալ դերասանուհի, ուղղակի սիրահարվեց ու ամուսնացավ կոմերսանտի հետ: Ինչ շնորհ որ ունեմ, մորիցս եմ ժառանգել՝ արտաքին, տաղանդ…Ես նրան միշտ էլ ասել եմ, որ ամեն ինչ արել եմ հանուն իրեն»,- ասաց Ալեն Դելոնը:
Գոհար ՀԱԿՈԲՅԱՆ
