Այսօր Շիրակի մարզի ընդհանուր իրավասության դատարանը, դատավոր Հարություն Մովսիսյանի նախագահությամբ, անմեղ ճանաչեց 9 տարի շարունակ Մատաղիսի գործով դատվող 27-ամյա երեք երիտասարդներին` վանաձորցի Արայիկ Զալյանին և գյումրեցիներ Մուսա Սերոբյանին ու Ռազմիկ Սարգսյանին:
Կարդացեք նաև
Վերջիններս մեղադրվում էին 2004 թվականի դեկտեմբերի 24-ին ԼՂՀ Մատաղիսի զորամասում զինծառայակիցներ Հովսեփ Մկրտումյանին ու Ռոման Եղիազարյանին սպանելու մեջ:
Այսօր վճիռը հրապարակվելու էր ժամը 14.00-ին, սակայն մեծ թվով ակտիվիստներ, իրավապաշտպաններ, ինչպես նաև երեք երիտասարդների հարազատները ժամեր առաջ նստել էին դատարանի դահլիճում` մտահոգ, լարված սպասելով վճռին:
Դատավորներ Հարություն Մովսիսյանի, Արմեն Խաչատրյանի ու Մարտին Սարոյանի հայտնվելուն պես, դահլիճը ավելի լարվեց:
Սակայն րոպեներ անց, երբ դատավորը ընթերցեց առաջին ամբաստանյալին` Ռազմիկ Սարգսյանին անմեղ ճանաչելու վճիռը, ամբողջ դահլիճը հուզմունքից ցնցվեց, միաբերան սկսեցին ուռաաաա~աա բացականչել, գրկախառնվեցին` փոխադարձ շնորհավորանքներ հնչեցնելով ու ուրախության արտասունքներ թափելով:
«Հալալ լինի էս դատարանին, թող ուրախ Նոր տարի անեն»,- գոռաց Ռազմիկ Սարգսյանի մայրը` Ջուլիետա Սարգսյանը:
Արայիկ Զալյանն ու Մուսա Սերոբյանը մեզ հետ զրույցում փոխանցեցին, որ իրենք սպասում էին արդարացման դատավճռի, իսկ Ռազմիկ Սարգսյանն ասաց, որ իր համար անակնկալ էր, չէր սպասում , որ վերջապես իր անմեղությունը կհաստատվի:
Նշենք, որ ըստ վճռի, գործը ուղարկվեց զինվորական դատախազություն`նոր անձի նկատմամբ քրեական հետախուզում հարուցելու համար , այսինքն՝ իրական մարդասպանին բացահայտելու համար:
Նունե ԱՐԵՎՇԱՏՅԱՆ
Տեսանյութը՝ «Գալա» հեռուստաընկերության
