Դեկտեմբերի 11-ին Սևմաշի տեխնիկայի տանը ելույթ է ունեցել «Խաչատրյան» եռյակը: Դաշնամուր` Արմինե Գրիգորյան, ջութակ` Կարեն Շահգելդյան, թավջութակ` Կարեն Քոչարյան: Քոչարյանին Սևերոդվինսկի երաժշտասերները ճանաչում և սիրում են. այս հրաշալի երաժիշտն արդեն երկու անգամ ելույթ է ունեցել այստեղ: Գրում է «Սևեռնի ռաբոչի» պարբերականը:
Խումբը ստեղծվել է 1999թ. և համերգներ է տվել ոչ միայն Ռուսաստանում, այլև Շվեյցարիայում, Լատինական Ամերիկայում և իհարկե՝ Հայաստանում:
Սևերոդվինսկում եռյակը կատարել է Սերգեյ Ռախմանինովի, Առնո Բաբաջանյանի, Դմիտրի Շոստակովիչի և Էդուարդ Միրզոյանի ստեղծագործություններից: Մեծ տպավորություն է գործել համերգի երկրորդ մասը, երբ նրանք նվագել են Շոստակովիչի և Միրզոյանի գործերից, գրում է նյութի հեղինակը ու նշում, որ իրեն միշտ թվում էր, թե Շոստակովիչը բարդ է ինչպես կատարման, այնպես էլ ընկալման համար, սակայն այնքան լավ էր հնչում նրա երաժշտությունը, որ հոգու խորքում անմիջական արձագանք ստացավ: «Բռավո» գոռոցներից ու դահլիճի ծափահարություններից հեղինակը եզրակացրել է, որ միայն իր մոտ չէր նույն զգացումը:
Կարդացեք նաև
Պատրաստեց Հովհաննես ԻՇԽԱՆՅԱՆԸ
