«Ժառանգություն» կուսակցության փոխնախագահ Արմեն Մարտիրոսյանի դիտարկմամբ, ՀԱԿ համակարգող Լեւոն Զուրաբյանի եւ ԲՀԿ-ական պատգամավոր Վարդան Օսկանյանի զրույցի ապօրինի գաղտնալսումն ու տարածումը քաղաքական լրտեսություն է: Այսօր «Հենարան» ակումբում նա ասաց, թե զրույցի մեջ ոչ մի առանձնահատուկ բան չի նկատել. «Այդպիսի փակ քննարկումները սխալ է ընդունել, որպես բացարձակ ճշմարտություն, որովհետեւ հնարավոր է խայծեր գցես դիմացինի կարծիքն իմանալու համար: Կարող է անկեղծ քննարկում լիներ կամ տեսական զրույց, եթե չեմ սխալվում այնտեղ հենց ասվում է տեսական քննարկենք:Եթե քննարկում է, ապա տարբեր սցենարներ կարող են լինել, իսկ սցենարները դնել քաղաքական գործունեության հիմք, սխալ է»:
Պարոն Մարտիրոսյանը համաձայն չէ այն կարծիքներին, թե հենց Օսկանյանի ձեռքի գործն էր. «Երկու ուժերի ներկայացուցիչներին ձեռնտու չէր, այս պարագայում պարոն Օսկանյանին ինչի՞ն էր պետք ձայնագրել, հիմա էլ տարածել, իմաստ չկա, սա դրսից իրականացված, այսինքն այդ երկու քաղաքական ուժերից դուրս է արվել: Խնդիր է, թե իշխանական որ դաշտից է արվել: Իմ տեղեկություներով, Հայաստանում գաղտնալսում են ոչ միայն ազգային անվտանգության ծառայությունները, այլեւ կան այլ մարդիկ, որոնք գաղտնալսելու հնարավորություն ունեն, իհարկե, իշխանական դաշտից են»:
Արփինե ՍԻՄՈՆՅԱՆ
Կարդացեք նաև
