Երիտասարդական ակումբների դաշնությունը (ԵԱԴ, FYCA) երեկ ավարտեց «Պայքար առցանց ատելության դեմ» երկօրյա ազգային սեմինարը: Ծրագիրն իրականացվեց Եվրախորհրդի եվրոպական երիտասարդական հիմնադրամի աջակցությամբ` Երևանում:
Սեմինարն իրականացվեց Եվրախորհրդի «Երիտասարդությունն ընդդեմ առցանց ատելության» 2013-2014 թթ. ընդգրկուն քարոզարշավի շրջանակներում, որի նպատակն էր անհրաժեշտ գիտելիքներով ու հմտություններով զինել երիտասարդությանն ու համատեղ ուժերով պայքարել ռասիզմի և խտրականության առցանց դրսևորումների դեմ:
Միջոցառումը համախմբեց ակտիվ երիտասարդների, բլոգերների, իրավաբանների, լրագրողների, ոլորտի փորձագետների, հասարակական և քաղաքական գործիչների, միջազգային կառույցների ներկայացուցիչների, որոնք հանդես եկան ելույթներով, ներկայացրին ոլորտում առկա ազգային առանձնահատուկ խնդիրները: Հարց ու պատասխանի միջոցով պարզ դարձավ, որ մասնակիցներն առավելապես հետաքրքրված էին առցանց տիրույթում առկա անհանդուրժողականությամբ, որն առավել արտահայտված է հարևան երկրների կողմից տարվող ատելության քարոզներում, հնչեցին հարցեր այդ երևույթների կանխարգելման մասին:
Անդրադարձ եղավ նաև ներքին խնդիրներին, որոնցից է ազատ խոսքի չարաշահումը, որը շատ հաճախ լրագրողական էթիկայի բացակայության և իրազեկման պակասի հետևանքով վերածվում է ատելության խոսքի:
Կարդացեք նաև
Սեմինարի մասնակիցները հրավիրված փորձագետների գործուն օժանդակությամբ մշակեցին 2013-2014 թթ. ազգային ռազմավարության նախագիծ` պայքարելու առցանց ատելության դեմ, հանդես եկան ապագայում համատեղ աշխատելու պատրաստակամությամբ:
Սեմինարի արդյունքում ստեղծվեց ազգային կոալիցիա, որը համակարգելու է մշակված ռազմավարության իրականացումը: Դրա կազմում ընդգրկվեցին տարբեր ՀԿ-ների, ուսանողական միությունների և պետական կառույցների ներկայացուցիչներ, ԱԺ պատգամավորներ: «ԵԱԴ-ը հետևողականորեն համակարգելու է այս աշխատանքները` պարբերաբար հանդիպումներ կազմակերպելով կոալիցիայի անդամների հետ, ինչի արդյունքում համատեղ կիրականացվեն տարբեր միջոցառումներ ու ծրագրեր ինչպես ՀՀ-ում, այնպես էլ արտերկրում» – իր փակման խոսքում հայտարարեց ԵԱԴ-ի նախագահ Ատոմ Մխիթարյանը:
Նելլի Գիշյան
«Պայքար առցանց ատելության դեմ» ազգային սեմինարի համակարգող
www.fyca.net
