Կալինինգրադում այսօր բռնցքամարտի Եվրոպայի երիտասարդական առաջնության կիսաեզրափակչի օրն է, որտեղ մեծամասնություն կազմում են ինչպես Հայաստանի ներկայացուցիչները, այնպես էլ այլ երկրների դրոշի ներքո հանդես եկող հայ բռնցքամարտիկները: Մեր տղաներից առաջինը կիսաեզրափակչի արգելքը հաղթահարեց պատանիների՝ աշխարհի ու Եվրոպայի երիտասարդների չեմպիոն 49 կգ քաշային Կորյուն Սողոմոնյանը, որն առավելության հասավ ռուսաստանցի Վասիլի Եգորովի նկատմամբ: Ճիշտ է, հաղթանակը Կորյունին դժվարությամբ տրվեց, սակայն, թերեւս, ավելի տպավորիչ էր 56 կգ քաշային Արամ Ավագյանի հաղթանակը, որը փակեց ադրբեջանցի փորձառու բռնցքամարտիկ Ջավիդ Չալաբիեւի ճանապարհը դեպի եզրափակիչ: Իր հայրենակցի սկսած գործը շարունակեց Ռուսաստանի դրոշի ներքո հանդես եկող Ավագ Ուզլյանը (64 կգ), որը 16-11 հաշվով եզրափակչի ուղեգրից զրկեց մեկ այլ տիտղոսավոր ադրբեջանցու՝ Եվրոպայի առաջնության այս տարվա բրոնզե մեդալակիր, օլիմպիական խաղերի մասնակից Հայբաթուլա Հաջիալիեւին: Եզրափակչի ուղեգիր նվաճեց նաեւ Գերմանիան ներկայացնող Գեւորգ Մանուկյանը: Նա միավորներով հաղթեց էստոնացի Ռայն Կարլսոնին: Հայաստանի երրորդ ներկայացուցիչը՝ 52 կգ քաշային Նարեկ Աբգարյանը, ռինգ մտնելու էր այսօր երեկոյան: Նա ուժերն էր չափելու ռուսաստանցի Վասիլի Վետկինի հետ, սակայն կայքերում երեկոյան մրցահերթի արդյունքներ առայժմ չկան:
Աշոտ ՀԱԿՈԲՅԱՆ
