Ինչպես հայտնի է, Վարդան Օսկանյանի «Սիվիլիթաս» հիմնադրամի գործունեությամբ հետաքրքրված ազգային անվտանգության ծառայությունը օրերս որպես վկա հարցաքննության էր հրավիրել նաև Սարդարապատ շարժման անդամ Գարեգին Չուգասզյանին: Սակայն, նրան հարցեր էին ուղղել ոչ թե «Սիվիլիթասի» գործով , այլ 2002 թվականին նրա կազմակերպության ` «Տեղեկատվական տեխնոլոգիաներ հիմնադրամի» ու Արտաքին գործերի նախարարության համատեղ իրականացրած գիտագործնական միջոցառման մասին:
Aravot.am- ը պարոն Չուգասզյանից հետաքրքրվեց, թե իր տպավորությամբ ո՞րն է ԱԱԾ-ի` անցած-գնացած միջոցառումներին այդ տեսակ հետաքրքրություն ցուցաբերելու նպատակը, ի՞նչ էին ուզում լսել իրենից: «Մեր միջոցառումը նվիրված էր տեղեկատվական հասարակությանը, և 2002 թվին մեր կազմակերպությունը, որը հիմա ևս կա, պաշտոնապես շփումներ է ունեցել ՀՀ Արտաքին գործերի նախարարության հետ` ի դեմս Վարդան Օսկանյանի:Եվ ինձ հարցերը ուղղված էին, թե այդ թվականին մենք ինչպե՞ս ենք շփվել, ի՞նչ եք արել , և հարցը էստեղ ոչ թե Վարդան Օսկանյանին էր վերաբերում, այլ իմ շփումներին Արտաքին գործոց նախարարի հետ: Եվ այդ թվականին իմ կազմակերպությունը արել էր միջոցառում, որի հովանավորների թվում Արտաքին գործոց նախարարություն է եղել, և գումարը Վարդան Օսկանյանի կողմից տրվել է այդ միջոցառման համար` 2 հազար դոլարի չափով, հարց տրվեց, թե ինչպե՞ս է օգտագործվել այդ գումարը:Ես էլ պատասխանեցի, որ այդ ամբողջ ֆինանսական ու բովանդակային հաշվետվությունը ներկայացվել է ոչ թե Վարդան Օսկանյանին, այլ Արտաքին գործոց նախարարություն: Հստակորեն այստեղ մի ուրիշ բան է գծագրվում, որ մեր նախաձեռնությունը, որը ծնեցինք, ես էլ համակարգողն եմ, այսինքն` «Նախախորհրդարանը», նրա ծնունդից հետո փաստորեն փորձ է արվում, տպավորություն է ստեղծվում գոնե, որ փորձ է արվում իմ 2002 թվականի գործունեությունը կապել Վարդան Օսկանյանի գործունեության հետ, որը, ես կարծում եմ, աբսուրդ է: Սակայն սա ոչ թե թուլացնում, վարկաբեկում , ստվեր է գցում «Նախախորհրդարանի» վրա, այլ ընդհակառակը հետաքրքրություն է առաջացնում «Նախախորհրդարանի» գործունեության նկատմամբ , այսինքն ևս մեկ անգամ ցույց է տալիս Հայաստանի կառավարման համակարգի ողջ սնանկությունը », -իրեն ԱԱԾ կանչելու իրական նպատակը այսպես մեկնաբանեց Գարեգին Չուքասզյանը:Նշենք, որ ակտիվ մտավորականներից բաղկացած այս նոր նախաձեռնությունը, որը կոչվում է «Նախախորհրդարան», այլևս չհանդուժելով երկրի գահավիժումը, իշխանությունների` ժողովրդից կտրված լինելը, պատրաստվում է իշխանափոխության:
Նունե ԱՐԵՎՇԱՏՅԱՆ
