Լուսանկարը` Գագիկ Շամշյանի
Դեկտեմբերի 15-ին Մեղրիի Արեւիկ գյուղի մոտակայքում վթարի ենթարկված Իրան մեկնող տուրիստական ավտոբուսի ուղեվորներն այսօր դուրս են գրվել Մեղրու տարածաշրջանային բժշկական կենտրոնից: Բժշկական կենտրոնի տնօրեն Ծաղիկ Վարդանյանի փոխանցմամբ` մարմնական տարբեր վնասվածքներով իրենց մոտ տեղափոխված բոլոր հիվանդներին ցուցաբերվել էր համապատասխան բուժօգնություն, այս պահի դրությամբ նրանց վիճակը բավարար կայուն է գնահատվում եւ կյանքին վտանգ չի սպառնում, վերականգնողական փուլը նրանք կշարունակեն իրենց բնակավայրերում:
Նշենք, որ դեկտեմբերի 15-ին մերկասառույցի պատճառով Մեղրու գետ գլորված իրանական ավտոբուսի 26 ուղեւորներից 1-ը` ԻԻՀ քաղաքացի 27-ամյա Մեհդաթ Սեիդ Նաջաթը մահացել էր տեղում, իսկ Իրանի մեկ այլ քաղաքացի, ում վիճակը ծանր էր, Մեղրու հիվանդանոցից նույն օրը տեղափոխվել էր Իրան: Ավտոբուսում կային ինչպես ՀՀ քաղաքացիներ, այնպես էլ ԻԻՀ բնակիչներ, իսկ տուրը կազմակերպվել էր հայկական եւ իրանական տուրիստական գործակալությունների հետ համատեղ: «Հոսպիատալիզացվել էր 25 ուղեւորներից 11-ը, մնացածին ամբուլատոր բուժօգնություն էր ցուցաբերվել: Հիվանդները բժշկական կենտրոն էին տեղափոխվել մարմնական տարբեր վնասվածքներով, վերին եւ ստորին վերջույթների կոտրվածքներով եւ այլն: Տեղում անհրաժեշտ բժշկական միջամտություններ են իրականացվել մեր կողմից, ցուցաբերվել է համապատասխան բուժօգնություն, իսկ այսօր նրանց վիճակը դուրս գրվելուց առաջ գնահատվում էր բավարար կայուն, առանց կյանքին սպառնացող վտանգի: Տուրիստական կազմակերպության հայկական կողմի` «Վասպուրական 238»ՍՊԸ-ի ներկայացուցիչն այսօր հանդիպումներ ունեցավ բժշկական կենտրոնում գտնվող հիվանդների հետ եւ իրանական տուրիստական գործակալության` «Դիդար Սեյր Գիթի» ՓԲԸ-ի հետ համատեղ կազմակերպվեց հիվանդների տեղափոխության գործընթացը: 5 ուղեւոր վերադարձավ Երեւան, իսկ մյուսները տեղափոխվեցին Իրան: Հետագա վերականգնողական էտապն արդեն համապատասխանաբար կիրականացվի նրանց բնակավայրերում», – «Առավոտին» տեղեկացրեց Մեղրու տարածաշրջանային բժշկական կենտրոնի տնօրեն Ծաղիկ Վարդանյանը:
Մերի ՍՈՂՈՄՈՆՅԱՆ
