Խորհրդարանն ավարտեց ԱԺ կանոնակարգ օրենքում փոփոխություններ եւ լրացումներ կատարելու մասին վիճահարույց նախագծի քննարկումը: ՀՀԿ խմբակցության պատգամավոր, հարցի հիմնական զեկուցող Արփինե Հովհաննիսյանի եզրափակիչ ելույթից հետո, ԱԺ նախագահ Հովիկ Աբրահամյանը բոլոր խմբակցություններին առաջարկեց վաղը հարցն իր մոտ եւս մեկ անգամ քննարկել՝ համաձայնություն գտնելու նպատակով: Այդ քննարկմանը կմասնակցի մեկական ներկայացուցիչ յուրաքանչյուր խմբակցությունից: ԱԺ ՀԱԿ խմբակցության պատգամավոր Նիկոլ Փաշինյանը չհամաձայնեց սույն առաջարկին՝ հղում անելով ԱԺ կանոնակարգ օրենքին ասաց, որ հարցն այժմ պետք է քվեարկության դրվեր կամ էլ հեղինակներն այն պետք է հանեն շրջանառությունից: «Դա Ձեր կարծիքն է: Հարմար պահի վաղը կորոշենք դնել հարցը քվեարկության»` ի պատասխան արձագանքեց ԱԺ նախագահ Հովիկ Աբրահամյանը:
Հիշեցնենք, որ առաջարկվող նախագիծը ենթադրում է ԱԺ էթիկայի հանձնաժողովում քաղաքական հավասարակշռություն ստեղծել: Գործող օրենքի համաձայն, կոալիցիոն ուժերը հանձնաժողովում ունեն երկու տեղ, իսկ մյուս խմբակցությունները, չորս: Հարցի քննարկումն այսօր խորհրդարանում անցավ բավական թեժ մթնոլորտում:
Նելլի ԳՐԻԳՈՐՅԱՆ
