ԱԺ փոխնախագահ, ՀՀԿ խոսնակ Էդուարդ Շարմազանովը Նիկոլ Փաշինյանի ելույթից հետո արտահերթ ելույթ ունեցավ ԱԺ-ում: Նրա խոսքերով՝ «Ես նպատակ չունեի ելույթ ունենալ, բայց գործընկերներս իրենց ելույթներով ուղղորդեցին, որը հիմնականում կլինի քաղաքական շեշտադրումներով: Ուշադիր լսում էի բոլոր հարցերը, պատասխանները: Նախ խնդրում եմ բոլորիս պահպանել կոռեկտություն, հավասարակշռություն: Սա սովորական հարցերից մեկն է, պետք չի զարմանալ, որ իշխանությունն ունի իր կարծիքը, այլընտրանքը՝ իր, ընդդիմությունը՝ իր: Իմ մոտ այնպիսի տպավորություն է, որ իրենց քաղաքական թիմում առկա խոստովանությունը, որ ինչ էլ լինի առավելագույնը 7-10 տոկոս ձայն կստանան՝ ջղաձգում է առաջացրել մեր գործընկերոջ մոտ: Մենք, ի տարբերություն ձեզ, ունենք լսելու ունակություն, պատրաստ ենք լինել հանդուրժող, ունեցեք էթիկա, մի ընդհատեք: Այս հարցը չքաղաքականացնե՛ք: Կարիք չկա ավելորդ զգացմունքայնություն ապահովել եւ խնդիրը տանել այլ դաշտ: Պետք չի զարմանալ, որ քաղաքական մեծամասնությունը պետք է հավասար ձայն ունենա, ինչ փոքրամասնությունը, էդ ո՞վ է ձեզ ասել, որ ընդդիմությունը պետք է ունենա ավելի շատ իրավունք, քան իշխանությունը: Բերեք աշխատենք կառուցողական եւ պետք չեղած դեպքում չմեջբերենք մեծարգո նախագահի խոսքերը»:
ՀՅԴ պատգամավոր Արծվիկ Մինասյանը նույնպես բուռն ելույթ ունեցավ: ԱԺ նախագահ Հովիկ Աբրահամյանը զարմացած էր. «Ես չգիտեմ ինչ է կատարվում ձեզ հետ, պարոն Մինասյան, բայց մի բան կատարվում է»: Ըստ Արծվիկ Մինասյանի՝ հերիք եղավ, բոլ եղավ, «ով որ եփել է այս բորշչը, թող նա էլ ներկայացներ այն»՝ նկատի ունենալով Դավիթ Հարությունյանին: Արծվիկ Մինասյանի դիտարկմամբ, ինչպես պահեց ԱԺ էթիկայի հանձնաժողովի նիստում Դավիթ Հարությունյանը, առանձին քննարկման թեմա է՝ էթիկայի հանձնաժողովում:
Հռիփսիմե ՋԵԲԵՋՅԱՆ
Կարդացեք նաև
