ՕԵԿ-ական պատգամավոր Խաչիկ Հարությունյանը ԲՀԿ-ական պատգամավոր Վարդան Օսկանյանի եւ ՀԱԿ համակարգող Լեւոն Զուրաբյանի զրույցի ապօրինի ձայնագրությունը անընդունելի երեւույթ, բայց բովանդակային առումով հետաքրքիր է համարում:
«Պարզ երեւաց, որ ՀԱԿ-ում լուրջ հիմնախնդիրներ կան: Պառակտումներ կան, որոնց մասին բարձրաձայնվում էին, բայց ապացույցներ չկային: Զրույցում հասկացանք, որ իսկապես ՀԱԿ-ն ունի լուրջ խնդիրներ: Այդ երեւույթի դեմն առնելու համար դժվար է, որովհետեւ ապրում ենք առաջավոր տեխնոլոգիաների դարում, երբ տեխնիկական հնարավորությունները զարգանում են , միգուցե օրենսդրական լուծում է պահանջում: Միգուցե պետք է սահմանել որոշակի սանկցիաներ, որ ամեն մեկը չկարողանա միջամտել մյուսի կյանքին»,- այսօր «Հենարան» ակումբում ասաց պատգամավորը:
Հարցին, թե ուր են տանում ապօրինի ձայնագրման ակունքները, նա կարծիք հայտնեց, որ ինչ-որ կոնկրետ տեղ հաստատ չեն տանում. «Հնարավոր է ինչ-որ մեկի սպորտային հետաքրքրություններից կամ նպատակներից է արվել, բայց օրենսդրական լուծումներ, եթե լինեն, ու հետամուտ լինենք, որ այդ օրենքները կյանքի կոչվեն, պարտավոր ենք սահմանափակումներ մտցնել այս ոլորտում, որովհետեւ տեխնոլոգիան օր օրի զարգանում է»:
Կարդացեք նաև
Նա ասաց, որ իրենց խմբակցությունում քննարկելու են ու հարկ եղած դեպքում համապատասխան օրենսդրական նախաձեռնությամբ անձամբ հանդես կգա :
Հարցին ,թե Օսկանյանի հետ զրույցը չի՞ նշանակում , որ ՀԱԿ-ը հիմա պայքարում է «ոչ սերժանտացմանը եւ այո դոդացմանը» սկզբունքով, պատգամավորն ասաց. «ՀԱԿ- եւ ԲՀԿ փոխհամագործակցության ակունքները մայիսից հետո երեւացին, երբ փորձեցին համագործակցության դաշտ ստեղծել: Մի կողմից ընդդիմություն, մյուս կողմից այլընտրանք, այսինքն՝ ոչ իշխանություն, ոչ ընդդիմություն , այս համագործակցությունը դժվար է պատկերացնել: Մարտավարությունը միգուցե ինչ-որ արդյունքներ բերեր, բայց ռազմավարության առումով առաջիկա հեռանկարում արդյունքների սպասել պետք չէ»:
Արփինե ՍԻՄՈՆՅԱՆ
