«Ես ցավում եմ ՀԱԿ-ի համար, որ Գագիկ Ջհանգիրյանը մտել է ՀԱԿ: Նա մեծ ստվեր է գցում ՀԱԿ-ի վրա եւ զրոյացնում է ՀԱԿ-ի գոյությունը»,- Aravot.am-ի հետ զրույցում այսպիսի տեսակետ հայտնեց Հելսինկյան ասոցիացիայի իրավապաշտպան Ռուբեն Մարտիրոսյանը: Նրա հետ զրուցեցինք օրերս նախագահական նստավայրի մոտ բանակում սպանված զինծառայողների ծնողների հետ բողոքի ակցիայի ժամանակ:
Ինչպես «Ժառանգության» պատգամավոր Զարուհի Փոստանջյանը, այնպես էլ Ռուբեն Մարտիրոսյանը վստահեցնում էին, որ այն ժամանակ զինդատախազ Գագիկ Ջհանգիրյանի «թեթեւ» ձեռքով մի շարք գործեր փակվեցին ու այդպես էլ արդարությունը չվերականգնվեց:
Մահացած զինծառայողների մայրերի խոսքերով՝ «Եթե Գագիկ Ջհանգիրյանը զղջացել է, թող ինքնախոստովանական ցուցմունք գրի բոլոր գործերի մասին: Իմ տղայի գործն ինքն անձամբ է փակել, թող բացի, եթե հասկացել է: Եթե Գագիկ Ջհանգիրյանը չդառնար զինվորական դատախազ, նա կդառնար Հայաստանի Հանրապետության ժողովրդական դերասան: Իր բախտը չբերեց, դարձավ դատախազ»:
Կարդացեք նաև
Ռուբեն Մարտիրոսյանը վստահեցրեց. «Տեղյակ եմ եւ գիտեմ փաստեր Գագիկ Ջհանգիրյանի կողմից կատարված հարյուրավոր հանցագործությունների մասին՝ հարյուրավոր զինվորական սպանության գործերով»:
Գագիկ Ջհանգիրյանի ավելի վաղ տված պատասխանը նման մեղադրանքներին՝ դիտեք «Ա1+»-ի տեսանյութում:
Հռիփսիմե ՋԵԲԵՋՅԱՆ
