Մոսկվայի դատարան է ուղարկվել Հայաստանի քաղաքացի, 26-ամյա Երվանդ Մնացականյանի նկատմամբ հարուցված քրեական գործը: Նա մեղադրվում է մի շարք բռնաբարությունների մեջ, որոնք ուղեկցվել են կողոպուտով: Հայտնում է «Ռոսիյսկայա գազետա» թերթը:
Թերթը հիշեցնում է, որ Մնացականյանը ձերբակալվել է հունվար ամսվա վերջին: Ըստ հետաքննության, 2011-2012թթ. ընթացքում, Մոսկվայի Վեշնյակի շրջանում կասկածյալը կանանց վրա առնվազն ութ հարձակում է կատարել:
Մոսկվայի ներքին գործերի նախարարության քրեական հետախուզման բաժնի մամուլի խոսնակ Ալեքսեյ Բախրոմեևը թերթին հայտնել է, որ գործի հետ կապված ինը կին է ճանաչվել որպես տուժող, որոնցից երկուսը անչափահաս են:
«Բոլոր հանցագործությունները կատարվել են նույն սխեմայով: Չարագործը ամեն օր վաղ առավոտյան մոտենում էր աշխատանքի գնացող երիտասարդ կանանց: Դանակով սպառնալով՝ կանանց մտցնում էր շենքի մուտք, որտեղ հարկերի միջև աստիճանների վրա բռնաբարում էր նրանց: Այնուհետև վերցնում էր բոլոր թանկարժեք իրերն ու փողերը: Օգտվելով իր որոշ զոհերի վախից՝ նրանց տանում էր մոտակա բանկոմատ, որտեղ իրենց հաշվից կանխիկ փող էր հանում: Բոլոր տուժածները նկարագրել են միևնույն մարդուն», – ասել է Բախրոմեևը:
Կարդացեք նաև
Քրեական գործը հարուցվել է երեք հոդվածների հիման վրա՝ բռնաբարության, սեռական բնույթի բռնի գործողությունների և կողոպուտի: Մնացականյանին սպառնում է ցմահ ազատազրկում:
Պատրաստեց Հովհաննես ԻՇԽԱՆՅԱՆԸ
