Այսօր նորաստեղծ «Ժողովրդավարական Հայաստան» երիտասարդական կուսակցության առաջնորդները հայտարարեցին հասարակության մեջ իրենց ի հայտ գալու պատճառների, դերի ու նշանակության մասին:
Կուսակցության հիմնադիր նախագահ Վաղարշակ Հակոբյանը, փոխնախագահ Մխիթար Հայրապետյանը, եւ քաղխորհրդի անդամները ներկայացրեցին կուսակցության գաղափարական եւ ծրագրային դրույթները, խոսեցին հայ երիտասարդության ներկայիս խնդիրների մասին, որոնք, ըստ իրենց, լուծելու ժամանակն է:
Ռեալ գնահատելով իրենց շանսերը՝ Հակոբյանը նշեց. «Կուսակցությունը դեռեւս կազմավորման փուլում է գտնվում, ունի 300 համակիր, բայց մեր կազմում հիմնականում երիտասարդներ են: Մենք ոչ մեկից աջակցություն չենք խնդրելու, որ ավելորդ շահարկումների առիթ չդառնա, իսկ ֆինանսական աղբյուրները գոյանալու են անդամավճարներից»,-ասաց Հակոբյանը, հավելելով, որ կայացած կուսակցություններն այսօր ունեն երիտ թեւեր, նրանք ընդամենը կցորդներ են, իսկ իրենք՝«Ժողովրդավարական Հայաստանը» անկախ է ու լուծելու է երիտասարդների սոցիալական եւ կրթական հարցերը:
Հայրապետյանի խոսքով էլ՝ իրենց կուսակցությունը գործելու է ազգային պետական շահին համապատասխան: Իսկ ինչ վերաբերում է նախագահական ընտրություններում որեւէ ուժի սատարելուն, ապա, ըստ նրա՝ ամեն ինչ պարզ կլինի միայն համագումարից հետո, որն էլ կլինի մյուս տարի:
Կարդացեք նաև
Հայրապետյանը նաեւ նշեց, որ իրենք գիտակցում են, որ իրենց սատարելուց կամ չսատարելուց քաղաքականության մեջ, իհարկե, ոչինչ չի փոխվի, քանի որ դեռ նոր են, բայց ամեն դեպքում, չի բացառվում՝ որեւէ մեկին սատարելու հավանականությունը. «Ամեն ինչ պարզ կդառնա համագումարից հետո, սակայն տեսականորեն բոլոր քաղաքական ուժերի հետ էլ կարող ենք համագործակցել, քանի որ բոլոր կուսակցությունները գործում են ազգային պետական շահին համապատասխան. Համենայնդեպս՝ այդպես գրված է նրանց ծրագրերում»:
Եվա ՀԱԿՈԲՅԱՆ
Կուսակցությունները, սոցիալական և կրթական խնդիրներ չեն լուծում, և եթե պատրաստ եք համագործակցել բոլոր կուսակցությունների հետ ավելի լավ է չստեղծեք այդ կուսակցությունը, քանի որ դրանցից շատ ունենք: