«Ես լաթերի մասնագետ չեմ: Հիմա պիտի ասես՝ այնա լցնենք, թե բարֆ լցնենք, չգիտեմ եսիմինչ անենք: Ես որտեղի՞ց իմանամ: Ալիկը կարող է տանը լվացք է անում՝ գիտի ոնց է լինում լաթը»,- այսօր Aravot.am-ի հետ զրույցում «Հանրապետություն» կուսակցության քաղխորհրդի անդամ Սուրեն Աբրահամյանն այսպես մեկնաբանեց ՀԱԿ-ին լաթի հետ համեմատությունը: Հիշեցնենք, որ Դավիթ Շահնազարյանի, «Հանրապետություն», Հայաստանի լիբերալ կուսակցությունների՝ ՀԱԿ-ից դուրս գալուց հետո ՀԱԿ համակարգող Լեւոն Զուրաբյանն ասել էր, որ ՀԱԿ-ն ինքնամաքրվում է: Իսկ «Ազատ դեմոկրատների» անդամ Ալեքսանդր Արզումանյանն այսպես էր հեգնել. «Ամեն մի կուսակցության հերթական դուրս գալուց հետո ՀԱԿ-ը է՛լ ավելի ուժեղ է դուրս գալիս, զտվում է, մաքրվում է, գուցեեւ մաքրման պրոցես է: Գիտեք, լաթը, որ շատ լվանում ես, սկսվում է ծակծկվել, չէ՞, ծակոտվել, գուցե այնքան զուլալանա, որ մեջը բան չմնա»:
Սուրեն Աբրահամյանը մեզ հետ զրույցում Լեւոն Զուրաբյանին այս առնչությամբ կարծես բանաստեղծական երկտող թողեց. «Ես էլ ասում եմ՝ թող մաքրվեն, թող բյուրեղանա՜ն, անգամ գոհարանա՜ն, թեկուզ շողե՛ր արձակեն, բայց մեզ հանգիստ թողնեն»:
Լաթի եւ ՀԱԿ-ի համեմատության հետ կապված ՀԱԿ անդամ Զոյա Թադեւոսյանն էլ ասաց, որ ՀԱԿ-ից դուրս եկած անդամներն իր ընկերներն են . «Ես նրանց հարգում եմ, նրանց հետ միշտ կապի մեջ եմ, զրուցում եմ: Անկախ ամեն ինչից, ես նրանց համարում եմ քաղաքական պայքարի իմ ընկերներ: Ես իմ ընկերների հանդեպ, նույնիսկ եթե բաժանվում եմ իմ ընկերներից, ես նրանց մասին վատ բան չեմ խոսում»:
Հռիփսիմե ՋԵԲԵՋՅԱՆ
Կարդացեք նաև
