Ականատեսների վկայությամբ, այսօր կեսօրին «Գյումրեցի ընկերներ» ՍՊԸ-ի աշխատակիցները, թվով մոտ 30-40 հոգի, բողոքի ցույց են կազմակերպել քաղաքապետարանի նախամուտքի մոտ`Սամվել Բալասանյանից պահանջելով իրենց աշխատավարձը: Նրանք իրենց գումարը նախևառաջ պահանջել են գործատուից` Վարդան Ղուկասյանի որդի Սպարտակից ու նրա մոտ ընկեր Արման Բադալյանից, ովքեր, սակայն, նրանց ուղղորդել են դեպի քաղաղաքապետարան` ասելով, որ թող քաղաքապետարանը ՍՊԸ-ի պարտքերը տա, մենք էլ` ձեր պարտքերը:
Հիշեցնենք, որ դեռևս ավագանու արտահերթ նիստի ժամանակ Գյումրու նորընտիր քաղաքապետ Սամվել Բալասանյանը դժգոհեց, որ «Գյումրեցի ընկերներ» ՍՊԸ-ն իբրև թե փոսալցման աշխատանքներ է կատարել Գյումրիում, սակայն, իրականում պայմանագիր չունենալով քաղաքապետարանի հետ, յուրացրել է բյուջեի փողերը. աշխատավարձ տալու փոխարեն 335 միլիոնի դոտացիա հատկացվել է այս ՍՊԸ-Ին: Իր հեռանալուց հետո էլ Վարդան Ղուկասյանն այնպես էր արել, որ Սամվել Բալասանյանը ակամա 427 միլիոն գումարի պարտք մնա իր որդուն: «Գյումրեցի ընկերներ» ՍՊԸ-ն էլ Սամվել Բալասանյանի` քաղաքապետի պաշտոնը ստանձնելուն պես, նամակ էր գրել ու սպառնացել իր պարտքը չվճարելու դեպքում դատի տալ: «Զարմանալի պարտք է՝ 427 միլիոն: Տարվա ընթացքում փոխանցվել է 335 միլիոն, դոտացիայի գումարները, որը որ աշխատավարձ պետք է տրվեր, փոխանցվել են այս ընկերությանը, մեծ գումարներ: Ի՞նչ է կատարվել, 335 միլիոնին գումարենք 427, մոտավորապես 750 միլիոն դրամ այս ընկերությունը ասֆալտապատման աշխատանքներ է կատարել, այդ ասֆալտապատումը եղել է փոսային նորոգումներով, եւ դա եղել է հիմնականում հուլիս ամսից հետո: Հուլիս ամսից հետո մենք էդքան աշխատա՞նք ենք կատարել փոսալցման: Ճիշտն ասած, ինձ համար աուդիտ կանչելը ճիշտ կլինի, որպեսզի մանրամասն ուսումնասիրվի՝ արդյոք սա իրատեսակա՞ն է համարվում, թե՞ ոչ, որովհետեւ ես խիստ կասկածում եմ՝ հուլիսից հետո փոսի նորոգում ես միայն Սովխոզի վրա եմ տեսել, բենզակալոնկի մոտ, ուրիշ տեղ ես փոսի նորոգում չեմ տեսել: Չունեն լիցենզիա, լիցենզիան չենք կարող գտնել, իրավունք չունեին ասֆալտապատման աշխատանք իրականացնել, բացի դրանից՝ չկան պայմանագրեր, պայմանագիրը 400 միլիոն է եղել, չէր կարող լինել 700 միլիոն, հիմա դուք մտածեք, թե ինչ է կատարվել, ո՞նց կարող ենք աուդիտ չբերել», – երկու ամիս առաջ ավագանու արտահերթ նիստի ժամանակ հայտարարել էր պարոն Բալասանյանը: Ու քանի որ նրան չհաջողվեց աուդիտ հրավիրել, այսօր Սպարտակ Ղուկասյանին պատկանող կազմակերպության բանվորները իրենց գումարը պահանջել են Սամվել Բալասանյանից: Նրանց ընդունել է քաղաքապետարանի գլխավոր ֆինանսիստ Լենա Ջիլավյանն ու քաղաքապետի մամլո խոսնակ Զոհրապ Եգանյանը, ովքեր և մատչելի բացատրել են , որ այս ՍՊԸ-ի հետ կնքված պայմանագիր չկա, հետևաբար և փողերը պետք է պահանջեն գործատուից: Վերջիններս, կռահելով , որ իրենք ընկել են նախորդ քաղաքապետի կազմակերպած խաղերի մեջ, առայժմ հեռացել են:
Նունե ԱՐԵՎՇԱՏՅԱՆ
Կարդացեք նաև
